‘LIDER’ SA NPA NADAKPAN

Giilang leader sa New Peoples Army sa lalawigan sa Bohol nga adunay pending warrant of arrest sa kasong murder nasikop sa Bohol Provincial Police Office inabagan sa Criminal Investigation and Detection Group 7 sud sa tambalanan sa dakbayan sa Tagbilaran.

Ang dinakpan mao si Pedro Lumantas 54, taga Barangay Magsaysay, lungsod sa Sevilla, Bohol.

Sa report nga gipadangat sa Bohol PNP nga niadtong Hunyo 14, nagpatambal sa Ramiro Community Hospital sa Gallares street sa syudad sa Tagbilaran ang suspek human makaangkon og samad pinusilan sa lawas.

Nagdala sa laing ngalan si Lumantas nga giila matod pa nga Victor Penarejo.

Usa ka concerned citizen ang mihatag sa kasayuran sa nahimutangan sa dinakpan human sa subsub nga pagpangita sa mga otoridad sa mga gidudahang membro sa rebeldeng NPA sa lalawigan.

Giila si Lumantas nga deputy secretary sa Bohol Party Committee ug aduna pay ranggo sa komunistang grupo.

Ang pagdakop kang Lumantas pinasikad sa warrant of arrest nga giluwatan ni Executive Judge Suceso Arcamo sa RTC Branch 47 sa dakbayan sa Tagbilaran sa kasong murder nga pinitsahan niadtong Octobre 13, 2017.

Gisubay nila karon kon nganong nakaangkon og pinusilan sa lawas ang dinakpan sanglit wala pa matod pa kini motug-an sa kapulisan.

Hugot nga siguridad ang gipatuman karon sa kampo sa Bohol Provincial Police Office uban sa mga sundalo sa probinsya sa pagtuo nga adunay himuon nga rescue operation ang mga rebelde. /