Cash gift sa centenarians pun-an

Buot ni Mandaue City Mayor Luigi Quisumbing nga pun-an og P50,000 ang madawat unya nga cash incentive sa mga centenarian sa dakbayan aron mahimo na kining P100,000.

Niadtong Mayo 30, ang mayor nisuwat sa Sangguniang Panlunsod sa dakbayan nga kalabot sa maong tinguha.

Atol ning pagsuwat, padayon pang gi-review sa konseho ang hangyo sa mayor.

Sa iyang suwat, si Quisumbing nihangyo sa konseho sa dakbayan nga i-review ang ordinansa no. 13-2016-1092 (kanhi gi-amendar nga ordinansa no. 12-2011-633) sa pagtan-aw sa posibilidad nga patas-an ang cash gift sa kagamhanan sa dakbayan ngadto sa P100,000.

“Ang atong cash gift man gud is fifty thousand. It seemed more appropriate man gud to be P100,000 given that it is their celebration of the hundred years of the person’s life,” matod ni Quisumbing sa dihang nahinabi sa Superbalita Cebu.

Dugang niya nga minos lang ang makaabot sa maong edad sa dakbayan ug minos sab ang makadawat sa maong pahalipay gikan sa kagamhanan.

Gani, paambit niya nga wa kaabot og napulo ka mga centernarian ang nakadawat og cash gift sa nilabayng duha ug tunga ka tuig.

“We feel that this is something but just right to celebrate a hundred year, it should be P100,000,” matod ni Quisumbing.

Kon aprobahan unya sa konseho sa dakbayan ang hangyo sa mayor, mas modako pa unya ang madawat sa mga centenarian sa Mandaue sanglit aduna pa man kini madawat nga cash gift gikan sa national government nga P100,00, probinsya sa Sugbo ug Department of Social Welfare and Development (DSWD) 7.