Mandaue molusad og housing proj.
Gikatakdang makighimamat unya si Mandaue City Mayor Luigi Quisumbing sa mga taga- National Housing Authority (NHA) ug Pag-ibig aron hisgutan ang dako nga socialized housing project di lang sa mga uyamot nga mga Mandauehanon apan lakip na sa mga kawani sa city hall karong semaha.
Sa dihang nahinabi sa Superbalita Cebu, si Quisumbing niingon nga nakadawat siya og tawag gikan sa Office of the President kalabot sa socialized housing project nga itanyag niini sa dakbayan sa Mandaue.
“And not just socialized housing project but several housing projects. One, specifically for indigents. The other one is possibly for the employees of the Mandaue City Government. So, we are going to be meeting with the representatives from NHA and Pag-ibig to figure out how we can implement it,” sumala sa mayor.
Dugang niya nga mas gamay-gamay ang housing project sa mga kawani sa gobyerno kumpara sa mga kabus.
Wa pa mahibaw-i ni Quisumbing kon pila ang budget niini, wa pa sab mahibaw-i niini kon pila unya ka mga pamilya ug kawani sa gobyerno ang makapahimos sa maong proyekto.
Lakip sa wa pa sab mahibaw-i kon kini itanyag nga libre sanglit ang adunay minimal nga bayad ang mga government housing nga P3,500 paubos matag buwan, ni QUisumbing.
Sa meeting, gikatakdang mahibaw-an na unya nag plano, kon asa mahimutang ang mga proyekto ug kon pila ka mga housing units ang gikatakdang tukuron. Gawas niini, ilang hisgutan ang mechanics sa pagpili unya og benepisaryo alang sa proyekto.
“We’re talking about several hundreds, at the very least, housing units. Now, when it comes to the beneficiaries, who will be beneficiaries, it will be a standard practice that the requirement of the availment of the housing unit is supposed to be by the city ordinance as to who is entitled to avail,” paambit niya.
Sigun ni Quisumbing nga aduna na silay mga nakitang kabutangan sa maong mga proyekto ug naghinamhinam na siya sa panagtigum aron ipakita ang iyang plano ilabi na ang kalabot sa luna ug aron makatrabaho niini.