GILUBONG UBAN SA MAHALONG AWTO

Talagsaon ang gihimo sa usa ka anak nga nipalubong sa iyang amahan nga namatay sud sa bag-ong mahalon nga awto inay sud sa lungon.

Ang awto nga usa ka klase sa BMW nagkantidad 66,000 pounds.

Ang lalake nga ginganlan og Azubuike, nisaad sa iyang amahan nga palitan niya og luho nga awto ugma damlag.

Apan, namatay ang iyang amahan sa Ihiala, Nigeria, sa wala pa niya matuman ang iyang gisaad.

Sa report sa Daily Mail nga nikutlo sa mga tahol sa local

media, gusto niini nga motuman sa saad sa iyang amahan ug niadto kini sa usa ka showroom sa mga awto ug nipalit og BMW diin gilubong kuyog sa iyang amahan.

Sa usa ka hulagway sa funeral

service, makita ang mahalong awto nga anam-anam gilunod sa mga lalake sa dakong lubnganan nga may gilawmon nga unom ka mga tiil.

Ang maong nag-viral sa social media.

Sukad gi-upload, niabot na og 25,000 ang shares sa hulagway sa pagkutlo ning balita.

Lainlain ang mga reaksyon sa mga tawo nga nakakita sa maong hulagway.

Dunay uban nipadayag nga nag-usik-usik lang og kwarta si Azubuike.

Ang uban niingon nga dunay satellite navigation ang BMW nga makatabang sa iyang amahan sa pagpangita sa agianan padung sa langit.

Niadtong 2015, usa ka bilyonaryo ang nipalubong usab sa iyang inahan sud sa bag-ong Hammer ug sa samang tuig, usa ka lalake ang gilubong sa iyang paborito nga awto sa China. ■ MAHALONG LUNGON: Anam-anam nga gitumod ngadto sa lubnganan ang mahalong awto diin gipahiluna ang lawas sa usa ka amahan nga namatay, nga unang gisaaran sa iyang anak nga palitan og awto sa wa pa mamatay.