Dili angayan basulon ang media

Misimpatiya ako sa mga kabanay nila ni Senior Inspector Raymund Hortezuela ug PO3 Jonathan Tilos nga parehong napatay. Si Hortezuela napatay sa iyang mga kaubang pulis atol sa usa ka buy bust operation sa Tipolo, Mandaue City niadtong Dominggo gabii. Gitumbok siya nga protektor sa napatay nga druglord nga si Jeffrey ‘Jaguar’ Diaz. Nahilambigit siya sa illegal drug trade. Ang maong akusasyon kusganong gipanghimakak sa iyang pamilya.

Samtang si Tilos gibanhigan sa wala pa mailhing mga mamumuno sa lungsod sa Alegria niadtong Miyerkules sa gabii. Nadestino siya sa Ginatilan Police Station. Gitumbok usab si Tilos nga nahilambigit sa illegal nga drugas. Na-identify siya nga konektado sa confessed druglord nga Franz Sabalones. Gipanghimakak usab sa pamilya ni Tilos ang iyang kalambihigan sa drugas. Apan ang usa sa gitutukan sa mga imbestigador mao ang illegal drug issue.

Biktima ba sila si Hortezuela ug Tilos sa internal cleansing sa PNP? Kuyaw ning internal cleansing sa PNP kay pamatyon gyud. Wala nay kiha-kiha aron matangtang sa serbisyo kay kon ikiha posible pa nga maabsuwelto. Maayo nang patay kay siguradong mapapas gyud sa listahan sa PNP. Matod pa sa atong kasaligang tinubdan nga daghan pa ni silang patyonon. Mao ni klarong cleansing para mawala gyud ang nga salawayon sa serbisyo.

Ang nakaporke lang pod sa mga kabanay kay gi-apil man og basul ang media. Ang media nagpataka lang kuno og report kabahin sa dili maayong background sa gipamatay nga mga pulis. Ato lang ning klarohon ang papel sa media. Dili angayan nga basulon ang media kabahin sa mga nanggawas nga bating background sa maong mga pulis.

Ang maong mga kasayuran dili tumo-tumo sa taga media. Ang mga inpormasyon gikan mismo sa kadagkuan sa kapulisan. Sila mismo ang nagbutyag kabahin sa kalambigitan sa illegal nga drugas sa maong mga pulis ug igo lang nag-report ang media. Mensahero lang ang media ug dili mismo ang tinubdan sa maong negatibong inpormasyon. Busa dili angay nga basulon ang media.