Kahigayonan wala palabya
MicRO-fiNANce NANAy RAMON ABOITIZ FOUNDATION, INC. (INC)
Ang kinabuhi swerte-swerte lang pero kon moabot na gani kini sa imong kinabuhi, dawata gyud ug gamita sa saktong paagi.
Ako si Judith Alburo, 47, taga Valencia, Dumaguete City, Negros Oriental. Nagtrabaho isip usa ka panday ang akong bana sa una samtang ako adunay gamayng tindahan nga nakadugangdugang sa among inadlaw-adlaw nga kita.
Aduna kamiy upat ka mga anak nga gipaeskwela sa elementarya ug kolehiyo. Tungod kay gamay ra kaayo ang kita namo sa akong bana, naglisod mi og hatag sa bawon sa mga bata kada adlaw.
Sakit gyud sa buot sa una nga dili namo mahatag ang gusto sa among mga anak. Maluoy sab ko sa akong bana nga kapoy kaayo ang lawas kada human og trabaho, maong nagsige ko og hunahuna og laing paagi nga mahimong makadugang sa among kita.
Usa ka adlaw, naay usa ka staff sa Ramon Aboitiz Foundation Inc. Micro-finance, Inc. (RMF) nga nianhi sa among lugar. Iya ming gipasabot sa bintaha ug mga produkto sa sama nilang nagpautang og puhunan, maong naingganyo ko nga moapil.
Gipahuwam ko nila og P5,000 isip unang loan, nga akong gikompra og tinda alang sa among sari-sari store. Paglabay sa duha ka mga tuig, nidako gyud ang akong sari-sari store ug nakapundar kami og baboyan.
Tungod sa among pagkugi ug pagsalig sa Ginoo, napahuman namo sa akong bana among mga anak sa kolehiyo maong niundang na siya sa pagpamanday.
Dako gyud ko og pasalamat sa Ginoo kay niabot kanamo ang kahigayonan nga nakalambo sa among negosyo. Nagpasalamat sab ko sa akong pamilya nga bisan sa kalisod sa among kahimtang sa una nag-inunungay gihapon kami.
Alang sa mga nagnegosyo og ginagmay sama nako, akong ikaingon mao nga aduna gyuy kalamboang moabot sa atong kinabuhi basta magkugi lang ta og mosalig lang gyud sa Ginoo.
Ug kon may moabot nga kahigayonan, ayaw pagduhaduha, pahimusli kini ug ampingikay mao na kana ang imong gipaabot nga grasya.