MACMAC OKEY NA
Mga duwa karon 4:30 pm- Alaska batok Meralco 6:45 pm- Ginebra batok Magnolia
Grabe ang kalipay ni Macmac Tallo nga nakabalik na siya’g duwa human sa unom ka mga buwan nga pagpaalim gikan sa usa ka sakit.
“Syempre talagang excited. First actual five-on-five game ko after six months, nag-dasal lang ako at nag-relax. Pinakita ko kung anong kaya kong gawin lang muna, at the same time, finollow ko lang kung anong sinasabi nila coach sa defense,” matod ni Tallo sa interbyu sa Spin.ph.
Si Tallo, kinsa 10th overall pick sa Talk N’ Text KaTropa sa 2017 Philippine Basketball Association (PBA) Draft, impresibo og gipakita sa iyang pagbalik og duwa ubos sa bag-o niyang team nga mao ang NLEX Road Warriors.
Ang produkto sa Southwestern University (SWU) Cobras nagpakatap og 11 puntos, tulo ka steals, tulo ka assists, duha ka blockshots ug usa ka rebound.
Ang nakaapan lang kay ning maong kombati, napilde ang Road Warriors batok sa Alaska Aces, 120-111.
Kon buot hunahunaon, ang gipakitang duwa ni Tallo usa na ka dakong kalampusan alang kaniya gumikan sa kamatuoran nga na-diagnose siya og latent tuberculosis.
“Nahirapan ako huminga eh. Nagka-latent TB ako. Di naman siya contagious pero pina-rest lang talaga ako ng two months at nag-gagamot ako,” pasabot ni Tallo.
Dihang naalim ang sakit ni Tallo, nagpakondisyon siya og balik hangtod nga niabot ang maayong balita alang kaniya.
Ang Road Warriors ni coach Yeng Guiao mipunit kang Tallo gikan sa free-agent pool gumikan kay kuwangan ang team og tawo sa pointguard position sa pagkawagtang nila ni Keifer Ravena ug Kevin Alas.
Sa laing bahin, magsangka ang Alaska Aces ug Meralco Bolts sa premirong duwa karong hapon sa pagpadayon sa Commissioner’s Cup sa Araneta Coliseum.
Sa main game, magkombati ang Magnolia Ang Pambansang Manok Hotshots batok Ginebra Gin Kings.