Mga Peñalosa batok Indons sa Bohol boxing
Protektahan ni Dave Penalosa ang iyang limpyong baraha sa iyang pagpakigsangka sa beteranong Indonesian fighter nga si Ricky Manufoe karong Hulyo 7 sa main event sa Rumble in Bohol boxing nga ipahigayon sa Bohol Wisdom School Gym, Tagbilaran City.
Dala ang 12-0, 8KOs nga rekord, ang anak ni kanhi world champion Dodie Boy Penalosa gipaabot nga makasugat og malisod nga pagpakigkombati batok ni Manufoe kinsa aduna nay 64 ka away, 27 ang daog, 34 ang pildi ug tulo ang tabla nga baraha.
Kini maoy unang away ni Penalosa, pag-umang ni twotime world champion Gerry Penalosa, sulod sa dul-an duha na ka mga tuig.
Katapusan siyang nakaaway niadtong Septiyembre 3, 2016 diin iyang gipukan si Edison Berwela didto sa SMX, Pasay City pinaagi sa unanimous decision nga kadaugan.
Ang laing Penalosa nga si Carlo, ig-agaw ni Dave, mopakita usab og aksyon ning maong promotion.
Si Carlo (11-1, 4KOs) nga taga San Carlos City, Negros Occidental, mosuway usab sa pagpakigharong sa laing Indonesian fighter nga si Iwan Key (11-21, 3KOs) sa laing 10-round fight.
Ang supporting bouts nga langkuban sa mga kulbahinam nga sinukliay sa kumo maoy mokompleto sa kinatibuk-ang boxing card nga gidalit ubos sa GerPens Boxing Promotions nga iya ni kanhi two-time world boxing champion Gerry Penalosa.
Ang promosyon nahimong posible sa pag-abag sa local government sa Tagbilaran City ug gipaluyohan sab kini sa Blackwater, Korgivit-E, Tanduay, Casino Filipino, Family Rubbing Alcohol ug Bohol Tropics Resorts.