KAWHI MOBIYA
Human sa pito ka mga tuig niyang pagduwa sa San Antonio Spurs, si Kawhi Leonard nagtinguha nang mobiya.
Sa taho sa San Antonio Express-News ug ESPN, adunay mga tinubdan ang miingon nga gusto na ni Leonard nga moduwa sa laing team.
Sukwahi kini sa taho sa Express News sa sayong bahin ning semanaha nga nakatakda nang makighugpong ang Spurs kang Leonard diin tukion ang posibleng supermax extension nga nagbalor og $219 million ug molanat og lima ka mga tuig.
Nakatakda untang makigkita si Leonard kang Spurs coach Gregg Popovich ning semanaha aron sulbaron ang tensyon nga naglambigit kang Leonard, kinsa sulod ra sa siyam ka mga duwa nakapakita og aksyon sa miaging season sa National Basketball Association (NBA) gumikan kay naangol ang paa niini.
Gikataho nga inisyal nang nagkasulti sila si Leonard ug Popovich apan wala pa kini personal nga nagtagbo.
Sa taho sa ESPN, giingon nga nagtinguha si Leonard nga mobalhin sa Los Angeles Lakers. Gilauman nga motanyag sab ang Boston Celtics kang Leonard.
Usa ka tinubdan nga nasuweto sa sitwasyon miingon nga nakahangyo na si Leonard sa San Antonio management nga gusto siyang matrade sa laing team.
Matod pa sa tinubdan nga dili na malipayon si Leonard sa iyang sitwasyon sa Spurs.
Ang mga kauban ni Leonard mipadayag sa ilang respeto bisan unsa pa’y pinal nga desisyon niini.
“He has to do what’s best for him,” asoy ni Spurs forward LaMarcus Aldridge.