CICC himuon nga 'Infinite City'
Ang istruktura nga kanhing gihimo "showcase" sa Cebu atol sa 2007 ASEAN Summit mamahimo na unya nga "world-class tourism magnet" sud sa tulo ka tuig, kana kon ang mga opisyal sa dakbayan sa mandaue moaprobar sa proposal nga tukoron ang "Infinite City.”
Ang Millennium Pan-Asia Hotel & Resort, Inc. nipresentar og proposal aron tukoron ang tourism infrastructure project diin gidesinyo nga modani og 360,000 turista matag tuig alang sa Mandaue City, samtang momugna og trabaho alang sa 5,000 nga direktang maempleyado ug 10,000 nga "indirect" nga madawat.
“Infinite City will have two hotels and serviced apartments, a grand casino, indoor theme park, cinemas, a pool garden, shopping centers, offices, and a 15,000 square-meter convention center,” matod Justin Xiao, chief executive officer sa Millennium Pan Asia Hotel and Resort, Inc.
Tukoron kini sa Cebu International Convention Center (CICC) nga nagubaw human moigo ang linog sa Bohol ug Cebu niadtong 2013.
Si Xiao maoy nangulo sa grupo nga mipresentar sa proposal sa mga opisyal sa Mandaue ug ubang mga hingtungdan atol sa public hearing niadtong Hunyo 14 sa Mandaue Hall of Fame, Mandaue City Hall.
Ang hearing may kalambigitan sa City Ordinance 142017-1159, nga naila nga “The Mandaue City Public-Private Partnership for the People (P4) Code.”
Ang Millennium Pan-Asia Hotel and Resort, Inc. nihanyag nga motukod og resort ubos sa public-private partnership agreement uban sa kagamhanan sa Mandaue City .
“We decided to locate in Mandaue City because being the progressive industrial hub of Metro Cebu, it deserves a world class tourism resort. In Mandaue, we will be the first,” matod ni Xiao.
Nitataw si Xiao nga ang resort nga sa pag-hire og mga empleyado prayoridad ang molupyo sa Mandaue.
Midugang siya nga usa sa mga kwalipikado nga miyembro sa matag urban poor nga pamilya nga anaa sa lugar nga ilang tukoron ang ilang dawaton.
Ang Mandaue City Technological and Entrepreneurial and Skills Training Center (MCTEST) ug Public Employment Service Office (PESO) maoy motabang sa pag-andam sa potensiyal nga dawaton.
Gawas sa trabaho, ang resort makabenepisyo sa lokal nga negusyo samtang makamugna og minilyon nga buhis.
Ang Mandaue may madugang nga P16 bilyones sa gross domestic product (GDP) sud sa 10 ka tuig, nagkanayon siya.
“It is good for us to take care of our host city and our neighbors for decades to come. We are good corporate citizens,” padayag ni Xiao.
Naghinamhinam na ang Millennium Pan Asia Hotel and Resort, Inc. nga mosugod sa ilang trabaho aron makatabang sa dugang kalambuan sa Mandaue.
“We are excited. We will soon be one with Mandaue City in further developing its booming economy. We look forward to contributing to the growth of the industrial hub of Metro Cebu,” midugang siy Xiao./