Influenza mosiaw sa tinguwan: DOH

Ting-uwan na. Ang influenza o mas naila sa tawag nga flu mosiaw ning panahona.

Sumala sa Department of Health (DOH), ang sayo nga pagpabakuna maoy labing epektibong paagi sa paglikay sa nagkataas nga kaso sa flu.

Sa Pilipinas, dako ang posibilidad sa pagsaka sa kaso sa influenza o flu sa ting-uwan.

Sa buwan pa lang sa Marso niining tuiga, aduna nay natala ang DOH nga 21,572 ka kaso sa mga sakit nga sama sa flu nga nakaapekto sa mga hamtong ug sa mga batang nag edad og usa hangtud sa upat ka tuig.

Alang sa pagsabwag og impormasyon, gihisgutan atol sa Expomom 2018 niadtong Sabado sa Ayala Center Cebu ang mga paagi sa paglikay sa influenza.

Si Dr. Jonathan Lim, kanhi pangulo sa Philippine Society for Microbiology and Infectious Disease sa Cebu, nipaambit sa iyang panlantaw kabahin sa posibleng pagsaka sa kaso sa flu.

Ang influenza o flu, usa ka sakit nga dinala sa usa ka virus nga muresulta sa subaw, hilanat, kahuyang, paglisod sa pagginhawa, ug sa mas grabe pa nga komplikasyon.

Adunay dakong risgo sa mga bata nga nag edad kwatro anyos paubos, mga tiguwang nga nag-edad 65 pataas, mga buntis, ug mga nagtrabaho sa mga hospital.

Matod ni Lim nga adunay dakong kalahian ang flu ug subaw bisag parehas ra og simtomas ang duha ka sakit.

Kinahanglang hatagan og dakong pagtagad ang influenza o flu kay dali ra kining makatakod ug mamahimong muresulta sa mas grabe sa komplikasyon. Di paigo ang pagpahuway ug ang pag-inom og tubig.