Armadong mga pari?

Tulo ka mga pari ang napatay ug usa ang nasamdan sa mga pagpamsul ug pagbanhig didto sa Luzon. Si Fr. Richmond Nilo, 44, gipusil ug napatay samtang nangandam sa misa niadtong Hunyo 10 sa Zaragoza, Nueva Ecija. Samtang si Fr. Mark Ventura, 37, gipusil patay human magmisa didto sa Gattaran, Cagayan province niadtong Abril 29.

Laing pari, si Fr. Marcelito Paez, 72, gibanhigan ug napatay sa mga tawo nga nagsakay og motorsiklo didto sa Jaen, Nueva Ecija niadtong Disyembre 5, 2017. Pipila ka adlaw sa wa pa mapatay si Fr. Nilo, si Fr. Rey Urmeneta, 64, usa ka kanhi police chaplain, gipusil ug nasamdan didto sa Calamba City, Laguna.

Gisusi pa sa kapulisan kon unsa ang motibo ug hinungdan sa maong mga pagpatay ug pagbanhig, ilabi na nga mga pari ang nabiktima ug kansang mga armas mao ra gyud ang rosaryo ug bindita.

Apan usa ka taho sa Inquirer nag-ingon nga sekretong namalit og pusil ang pipila ka mga pari didto sa Laguna alang sa pagpanalipod sa ilang kaugalingon tungod sa pagpatay sa ilang mga kaubang pari.

Kinahanglan tingali nga magtuon sab sila sa pagkablit sa gatilyo sa ilang armas. Di paigo nga duna silay pusil, kinahanglan sab nga hanas sila sa paggamit niini. Likayan sab nga maunay sila sa ilang pusil. Mora na unya ning salida sa sine nga “Bala at Rosaryo.”

Delikado pa gyud sa usa ka pari, kay tingalig inay pusil ang malanit, ang plastic nga botelya nga gisudlan sa bindita maoy mabunot. Pasiritan na lang unyag bindita ang mo-ambush kaniya?

Si Fr. Jerome Secillano, executive secretary sa public affairs office sa Catholic Bishops’ Conference of the Philippines, niingon nga supak ang kadagkoan sa Simbahan sa paghupot og pusil sa kaparian.

Apan di mabasol ang mga pari, matod pa niya, kon ang mga pari nagtuo nga ang paghupot og pusil mao ang bugtong paagi sa pagpanalipod sa ilang kaugalingon.

Dunay ginaingon sa Balaang Kasulatan nga kon sagpaon ka sa tuo nga aping, itaon ang pikas aping. Kon armado ang pari og .45 calibre nga pistola, igo na lang siyang moingon, “Suwayi.”