Tingbitay pa gihapon?

Nakabuylo na ang klase sa mga publikong eskwelahan. Nakasugod na sab ang ubang pribadong tunghaan. Apan daghan pa gihapon ang imong makit-ang ginikanan nga nagpunsisok sa mga tindahan og school supplies apil na ang uniporme. Pasabot niini duna pay daghan ang wa pa maka kumpleto sa mga kinahanglonon tungod sa kaapiki sa budget.

Ang ingon niini nga sitwasyon gitawag og tingbitay. Mao sab ni ang daling malitok sa uban nga nagsalig sa halin sa ilang baligya o bayad sa serbisyo. Minos ang kita kay tingbitay. Apiki sa budget kay naka tutuk si misis og mister sa bayranan sa eskwelahan. Ilabi na niadtong dunay gipaeskwela sa mga pribadong tunghaan. Gani ang uban nila napugos nalang sa pagpabalhin sa ilang mga anak sa publikong eskwelahan tungid sa grabing pagsaka sa tuition og ubang bayronon.

Kitang mga ginikanan nangandoy man gyud unta og maayong ugma para sa mga bata. Mao nga naghandum ta nga ang wa nato maagii nga kalisdanan di nila masinati. Apil na ang pagpaeskwela og mga private schools. Pero di gyud malikayan nga apikihon ang atong budget mao nga magsinabtanay nalang. Manghinaot nga mosabot ang mga hingtungdan nga tinunan. Ayaw mo kabalaka kay ang gugma sa inyong ginikanan way kinutuban bisan ning panahon sa tingbitay. BIYAHE

Sa mga pasahero nga gikan sa South unya ang inyong biyahe padung sa North duna nay paagi nga medyo hamugaway og gamay. Unyag sangko ninyo sa south bus terminal dunay mga bus nga inyong masakyan padung sa north bus terminal.

Si Joey Herrera, ang manager sa Cebvu South Bus Terminal (CSBT), nipailaila nako sa mga airconditioned bus nga nagruta gikan sa terminal padung sa Mactan Airport. Sa pagkakaron, adto pa ni mosangko sa Mepz 1 sa Lapulapu City. Unyag ka Hulyo adto na sa Terminal 2 sa airport kutob ang ilang biyahe. Sa ato pa, kong ang imong tuyo maagian ning maong mga bus di na kinahanglan nga mogawas pa ka sa south bus terminal.

Parehas nako. Unyag duty nako sa among opisina sa Jagobiao, Mandaue City pwede ra ko mosud sa south bus terminal unya mosakay sa maong bus. Adto nako manaug sa Pacific mall sa Ibabao-Estancia unya mobalhin og jeep nga nagruta og para norte. Kadtong para norte nga mag bus adto mo manaug sa north bus terminal. Ingon ana ka sayon ang biyahe ilabi na niadtong mopadung sa airport. Sa pagk karon di pa daghang unit nga nagdagan.

Siguro duna pay laing mga operator ang nagplano nga mopadagan og ilahang unit nga manukad sa ubang bahin sa Sugbo. Di diay pwede nga ang taga Daanbantayan nga dunay tuyo sa Ginatilan kausa nalang mosakay? O ang taga Santander nga moadto sa Medillin kausa nalang sab mosakay. Parehas gud sa ruta nga Cagayan de Oro City-Zamboanga City via Pagadian City dugay na kaayo ni nga gihimo. Dekada 80 nakasakay nako sa gitawag nila nga 5-stop. Ka lima nihunong ang bus gikan sa Cagayan de Oro hangtod sa Zamboanga City. Karon naa naman gani Cebu-Zamboanga City nga ruta nga manukad sa south bus terminal .

Ambot og nganong magbalhin balhin man ta og sakay nga naa may paagi nga makaminos sa kahasol ilabi na niadtong apiki sa budget.