Asawa nilayas

Dear Papa Joe,

Ako diay si Melanie, 25 years old ug ania ko magpuyo karon sa probinsya sa may south kauban sa akong duha ka anak nga nagpangedaron og 5 and 3 years old.

Kasal gyud mi sa akong bana pero wala siyay trabaho ug nangipon lang mi sa iyang mga ginikanan diha sa Syudad. Nagbuwag na mi sa akong bana. Ako siyang gilayasan kay wala nako maka-antos sa batasan sa iyang pamilya nga ngil-ad kaayog tratar nako. Gawas nga permi pakong padungog-dungogon og bati nga estorya, ako pa gyud ang mga trabahuon sa balay kay sugoon man pod ko sa akong bana kay lagi nangipon lang mi.

Ako rang giagwanta ang kapait hangtud nga akong nasakpan ang akong bana nga dunay ka text-text nga laing babaye. Mao kadto ang hinungdan sa among lalis permi. Ang nakapait pa gyud kay molaban niya ang iyang mga ginikanan ug ako pay mahimong bati. Ila kong tabangan maong wala na ko, makaantos nipauli ko sa among dapit.

Pero ang problema kay pait man pod kaayo ang kahimtang, pobre lang ang akong mga ginikanan ug ultimo karon lisod pangitaon. Akong gipaeskwela sa public school ang akong anak.

Ni text ang akong bana, iya kuno kong pabalikon sa ila. Mobalik kaha ko didto? Basin og mao lang gihapon ang mahitabo.

MELANIE

Dear Melanie,

Replayi ang imong bana, kon responsible siyang pagkatawo, mangita siya og trabaho ug mangita pod mog inyong kapuy-an kay dili maayo ang mangipon.

Kon mobalik ka sa ilaha, dakog posibilidad nga mabalik ra gihapon ang estorya basin unya mopauli nasab kag pinakalit sa inyong province ug mahasol pag apil ang imong mga anak.

Pasabta ang imong bana nga kon willing siyang makigbalik nimo, dapat seryoso na siya ug dili na mo entertain og laing babaye. Hinuon angay nimo siyang pangayuan og suporta bahalag ginagmay para sa inyong mga anak.

PAPA JOE

(Sa inyong problema ipadala sa papajoesuperb@ gmail.com)