Just for a moment
Morag wa ko sa akong kaugalingon pag-abot ko sa among balay. Milargo kog sulod sa akong kuwarto. Pagkahuman kog ilis kay nabasa man gyud ko, mihigda ko sa kama. Na, naunsa ba ko, uy? Mora man kog kahilakon?
Wa ko ganahing mikaon sa among panihapon. Wa ko batia ang katulugon. Ang akong hunahuna didto ra sa akong nakita. Nganong mikupot man si Joan sa kamot ni Syrell, ug I Syrell sab mipahid sa mga luha sa akong amiga sa iyang tudlo mismo?
Wa ko ganahing migawas sa akong kuwarto pagka ugma. Wa man say klase kay Sunday man. Unya mitingog ang akong selpon. Pagsusi nako, si Joan ang nagpadalag message.
“Magkita ta sa McDonald’s sa Fuente, lunch time.”
Gireplayan ko ang akong amiga.
“K.”
Nagtuo ko nga importante ang tuyo ni Joan nako. Karon pa mahitabo nga buntag pa gani, miteks na siya nako nga gusto siyang makigkita nako. Ambot ba, kalit man lang kong gikulbaan.
Hapit mi magkadungan pagabot si Joan sa fast food nga among gikasabotan. Siya ang nag-order sa among pagkaon ug drinks sa counter. Ug samtang nagkaon na mi, kanunay mopasiplat si Joan nako. Di ko komportable sa among sitwasyon. Gusto na kong makahibawo kon unsay tuyo ni Joan nako ron“Sure gyud ko nga duna kay isulti nako, Joan.”
“Oo, Aidee. You know, secret love nako si Syrell pero ikaw ang iyang gipangulitawhan.”
Na, kinsa man say di makalitan sa confession sa akong amiga? Nakugang gyud ko, uy!
“Nanguitawo na siya nako, Aidee. Hopeless na siya nga ma-in-love gyud ka niya. I know nga ikaw pa gihapon ang iyang love pero tungod kay gimahal ko man gyud siya, maong ako siyang gisugot.”
“You mean, Joan, nga uyab na mo?”
“Oo, Aidee.”
Wa na ko motiwas sa pagkaon. Morag mihuot ang akong dughan. Nananghid ko sa akong amiga nga mouna niya sa pagpauli. Miabot gyud ang panahon nga gigabaan ko sa pagduwa-duwa ko sa gugma sa mga lalaki. Nakarma na gyud ko sa pagpasakit ug pagpalaom kanila.
Nabatyagan ko nga gisakitan gyud ko pag-ayo karon. Nakahilak na gyud ko kay ang pinitik sa akong ksingkasing di ko kalimbongan. Nahigugma gyud diay ko sa tinuod kang Syrell.
(KATAPUSAN)