NEGUSYANTE ANDAM NGA MAKIG-AREGLO
Tag-iya sa construction firm sa tukoron nga multi-million
port project sa Barangay Sangat, lungsod sa San Fernando, nitanyag og amicable settlement ngadto sa lokal nga kagamhanan sa San Fernando, pinanguluhan ni Mayor Lakambini Reluya.
Si Reluya una nang niisyu og cease and desist order sa proyekto tungod sa giingong kakuwang sa gikinahanglan
nga mga rekisito ug uban pang legal issues.
Andam bakwion sa kontraktor ang reklamong iyang gisang-at batok ni Reluya sa Office of the Ombudsman.
Nakigtigum kang Gobernador Hilario Davide III kagahapon ang pangulo sa First Sangat SF International Port Corporation nga si Ruben Feliciano.
Ang multi-million port project ni Feliciano gipahunong sa lokal nga kagamhanan sa San Fernando tungod sa giingong kakuwang sa mga rekisito ug uban pang legal issues.
Giingong gireklamo sab kini sa mga mananagat sa dapit.
Ang cease and desist order nga giluwatan ni Mayor Reluya sa proyekto, maoy naingnan sa pag-aslom sa relasyon sa kontraktor ug sa LGU, nga niresulta gani sa pagtinubagay nila sa media reports.
Atol sa ilang tigum, si Davide nitambag kang Feliciano nga malinawon nga i-settle ang isyu.
Nisanong usab si Feliciano sa tambag sa gobernador ug gipublikar ang iyang tanyag kang Mayor Reluya alang sa amicable settlement.
Iya hinuong gibarugan nga kumpleto ang iyang mga papeles alang sa proyekto ug ilegal ug way basehanan ang giisyu nga CDO sa mayor.
“I’m doing business in San Fernando not to create trouble, not to create problems. I’m here to improve her (Mayor Reluya’s) place,” niingon si Feliciano. Isip kabahin sa amicable settlement, nipadayag og kaandam si Feliciano pagbakwi sa kasong kalapasan sa Anti-Graft and Corrupt Practices Act batok sa mayor ug uban pang opisyal sa lungsod nga una na niyang gisang-at sa Ombudsman.
Sa maong kaso, gi-akusahan ang mayor ug laing pito ka mga opisyal sa pagpamaligya sa karaan ug di na magamit nga mga sakyanan ug heavy equipment sa LGU, nga wala mo-agi og bidding.
Gisuwayan pagkuha ang habig ni Mayor Reluya apan sa pagsulat niining balita, wai mo
reply sa text ug di ‘sab ma-contact ang iyang cellphone.
Dihang gitawgan ang iyang opisina, gipahibalo sa iyang staff nga nagtambong og
budget hearing si Mayor Reluya. / AZLG