NATAGAKAN SA LUNGON SA MAMA, PATAY

Namatay ang usa ka Indonesian nga lalake human matagaki og lungon nga gisudlan sa lawas sa iyang inahan nga namatay na.

Ang insidente nahitabo sa North Toraja sa isla sa Sulawesi, Indonesia.

Si Samen Kondorura, 40, ang namatay gumikan sa kadaut nga nahiagoman sa iyang ulo human mahagbongi og lungon sa iyang inahan samtang giyayungan sa mga tawo.

Siya nakabsan sa kinabuhi sa tambalanan.

Sa report sa Agence FrancePresse (AFP) nahibaw-an nga ipahimutang unta sa mga lalake ang lungon sa lakkian, usa ka tower nga hinimo sa kahoy, alang sa traditional nga seremonyas sa lubong.

Nisaka sila agi sa kawayan nga hagdanan padung sa ibabaw sa lakkian samtang nag-alsa sa lungon apan, kalit niirog ang hagdanan ug nahugno.

“As the mother’s coffin was being raised to the lakkian, suddenly the ladder shifted and collapsed, the coffin fell and hit the victim,” asoy ni Julianto Sirait, chief commissioner sa Tana Toraja resort police, ngadto sa AFP.

Sa video, makita ang hagdanan kalit nidalin-as sa dihang padung na mosud sa tower ang mga lalake nga nag-alsa sa lungon. Tungod niini, nangatagak sa yuta ang mga lalake ug ang lungon tumong ngadto ni Kondorura.

Sumala ni Sirait nga nahitabo ang aksidente kay wa mapugngi og tarong ang hagdanan sa mga tagtungod.

Ang lawas ni Kondorura kuyog nga gihaya sa iyang inahan nga si Berta.

/ AFP ■ DISGRASYA SA LUBONG: Aksidente nga natagakan sa lungon sa iyang inahan ang usa ka Indonesian nga 40 anyos nga lalake nga maoy nakaingon sa iyang kalit nga kamatayon.