Mabatid hudlat sa BOPK?

Kon duna may unang mautingkay niining kalit nga pagtumaw karon ni Mabolo barangay captain-elect Nina Mabatid nga gihugonhugonan nga modagan usab pagka presidente sa Association of Barangay Councils (ABC) sa dakbayan sa Sugbo, way lain kon dili ang Bando Osmeña Pundok Kauswagan (BOPK).

Dili pa man tuod final ang decision ni Mabatid apan kon mahinayon, posibli nga makabungkag kini sa botos sa mga kapitan nga kaalyado ni Cebu City Mayor Tomas Osmeña.

Si Kapitan Franklin Ong sa Barangay Kasambagan maoy hugot nga giindorso ni Osmeña nga maoy ilang manok batok ni outgoing president Philip Zafra sa barangay Tisa nga maoy pambato sa Team Rama.

Apan ning pagbutyag karon ni Mabatid, kinsa nagpasilong sa BOPK sa niaging piniliay, nga abli usab siya sa pagdagan sa maong posisyon makahulma kini og tulo ka nagsinug-ang nga panagkombati alang sa maong puwesto.

Klaro ug halata alang sa BOPK kining maong stratehiya nga gigamit sa ilang kaatbang sa pulitika.

Sayod usab si Mabatid, kinsa bag-o pa sa pulitika, nga bisan og duna siyay pinansiyal nga kapabilidad dili sayon alang kaniya ang paghaylo niining nakagamot na mga pulitiko ilabi na sa mga loyalista sa BOPK.

Pero wa magpasabot nga dili siya hudlat sa pundok ni Osmeña tungod kay masihag man nga sama sa grupo sa oposisyon, gipaluyohan siya sa mga tawo ni Presidente Rodrigo Duterte.

Mohaom ang pangagpas ni Capitol Site Barangay Captain Manuel Guanzon sa BOPK nga ang pagsulod ni Mabatid sa eksina gituyo aron pagguba sa kamada sa BOPK.

Ang tumong mao nga bahala og kinsay modaog sa pagka ABC president basta dili lang kaalyado ni Osmeña.

Sa Agusto 20 pa man ang piniliay ug daghan pa ang mahitabo sulod ning mga adlawa. Kini maoy nindot natong sundan.