When summer is gone

Nagsige kog tan-aw sa mga lusok sa uwan samtang nagtindog ko sa terrace sa among resthouse. Di ko gusto nga moabot ang ting-uwan. Apan di gyud kapugngan ang panahon, may kausaban gyud kini. Wa na ang summer, ang panahon nga naghatag nakog kadasig, ang panahon nga nagpasabot nako nga samtang may kinabuhi pa duna gyuy paglaom bisan unsa pa kasakit ang nahiagoman diha sa kagahapon, ang panahon diin gisagop kog usab ang pulong gugma, nga kaniadto akong gisalikway ug gikailagan.

Summer. Ting-init diin gidawat ko sa mainiton nga pagbati ang bag-ong gugma.

Apan wa na ang summer. Mipuli na ang ting-uwan. Didto sa atbang, nalantaw ko si Raymund nga migawas sa dakong lagwerta sa gipuyang resthouse. Resthouse kini sa iyang iyaan nga tua na mamuyo sa London kay nakabana og taga didto. Usa ka nurse ang iyang iyaan nga nanarbaho sa London.

Panahon sa summer, nahimamat ko si Raymund dihang mibakasyon sab ko sa resthouse sa akong mga ginikanan dinhi sa lugar nga malinawon ug daplin sa dagat. Nag-inusara ko niadto samtang nagyaka sa puting balas. Ang lain-laing anggulo sa akong mga kasakit maoy akong gihunahuna. Kini ang rason nga wa ko mo-summer class kay gusto kong mag-inusara.

Kining among resthouse mao dayoy una kong nahunahunaan.

“Kon di makasamok ug makatugaw nimo, Miss, mahimo bang makig-estorya nimo. Laay diha kay ako rang usa.”

Nakatan-aw kog kadiyot sa lalaki nga miduol nako. Unya mao na say akong gitan-aw ang gitudlo niyang resthouse. Mibalik kog tan-aw sa lalaki. Nakita ko sa iyang nawong ang kaguol nga gibati.

Kadto ang sinugdanan sa among pagkaila ni Raymund. Tall, dark and handsome si Raymund.

Apan wa ko magtan-aw sa pangggawas nga hitsura sa lalaki. Maoy akong gibasehan ang pinitik sa akong kasingkasing ngadto lalaki, maguwapo o mabati man siyag nawong. Para nako, ang gugma maoy labing mahinungdanon diha sa pagpakigrelasyon, di ang hitsura, o kahimtang sa kinabuhi.

Si Israel.. ordinaryo lag hitsura. Nuon di sab siya batig nawong. Igo-igo ra. Family driver siya.

Daghan siyag karibal, mga anak og dato, pulos guwapo ug nagtungha sa mahalong unibersidad. Apan si Israel ang akong gisugot kay siya ang akong love.

Apan sakit kaayo ang iyang gibuhat nako.

(SUMPAYAN)