CHAN GINEBRA NA
Nakadugang og haligi sa gawas ang Brgy. Ginebra Gin Kings human nila nakuha ang sharp-shooter nga si Jeff Chan gikan sa Phoenix Fuel Masters.
Giaprubahan sa opisina sa komisyoner sa Philippine Basketball Association (PBA) kagahapon ang kasabutan nga nagahatod kang Chan sa Gin Kings baylo sa 1st round
pick sa umaabot nga PBA Rookie Draft.
Si Chan nag-average og 11.56 puntos apil na niini ang 35-percent three-point shooting, 4.4 rebounds ug 4.1 assists sa kasamtangang nagpadayon nga Commissioner’s Cup.
Sa edad nga 34, ang kanhi sakop sa Gilas Pilipinas nakapamatuod nga aduna gihapon siya’y ikabuga ug ang iyang mga tira sa gawas dako og ikatabang sa Gin Kings, nga nagsalig og insakto sa presensya nila ni 7-footer Greg Slaughter ug Japeth Aguilar sa ilawom nga bahin.
Sa milabay’ng duha ka mga tuig, tataw nga nagkaus-os na ang kapabilidad sa usa sa mga pambato sa gawas sa Gin Kings nga si Mark Caguioa, kinsa nag-edad na og 38.
Ang Gin Kings mingsalig na lang og insakto nila ni Kevin Ferrer, Scottie Thompson, LA Tenorio ug Sol Mercado sa tinirahay sa gawas.
Sa pag-abot ni Chan, ang Gin Kings nakabaton og usa ka lehitimong three-point shooter nga seguradong makabuak og depensa sa ilawom. Nagkanayon si Ginebra
coach Tim Cone nga anugon nga ilang gibuhian ang ilang katungod sa 1st round pick apan dili sab kamahayan ang pagkuha nila ni Chan.
“It’s always tough to give up a part of your future through first-round picks, especially for veteran players,” matod ni Cone sa interbyu sa Spin.ph.
“But Jeff obviously fills a big hole for us. His ability to spread the floor for Greg and Japeth could spell the difference.”
Gipasabot ni Cone nga dugay na niyang gihandom nga makuha si Chan gumikan kay grabe ang ilang panginahanglan sa usa ka lehitimong three-point artist.
“We’ve been targeting him for months now because we have always seen him as a guy who can lift us to a higher level,” dugang ni Cone.
“If we can get two or three good years from Jeff, then the sacrifice of our first-round pick will be worth it.”