‘DRUG LORD’ GIPATAY SUD SA JAIL

STEVE GO GIPUSIL SA KAUBAN TUNGOD SA HANTAK

Kauban ra nga binilanggo sud sa Mandaue City Jail ang nipusil patay sa giila nga drug lord nga si Steve Go, 40.

Niresulta sa pagkanselar sa dalaw sa Mandaue City Jail human sa duguong hitabo kagahapon sa alas 11:30 sa buntag diin ang pagpamusil nahitabo sud sa TC-2 building.

Base sa inpormasyon nga nahipos ni SP03 Ariel Perez, chief investigator sa Police Station 5 sa Mandaue City Police Office (MCPO) inabagan ni J03 Christopher Delega, imbestigador sa Mandaue City Jail Male Dormitory, ilang giila ang mamumuno nga si Cresenciano Heyrana, 41, taga Barangay Tawason, Mandaue City.

Matod pa nga miangkon si Heyrana nga maoy nipusil kang Go sa pasangil nga gihulga siyang patyon sa nauwahi.

Giingong nagkalingaw og duwa sa hantak si Go uban sa iyang grupo ug nahitabo ang init nga panaglalis tali nila ni Heyrana.

Sa dihang mi-itsa na sa sinsiyo si Go aron sa pagpadayon sa ilang duwa, nakahigayon og kuha si Heyrana sa .38 caliber revolver nga gipanag-iya ra usab ni Go nga gitagoan diha sa higdaanan.

Gipusil ni Heyrana si Go tumong sa ulo niini nga niresulta sa kaguliyang sud sa prisohan.

Dali nga gidala sa Mandaue City Hospital si Go, apan patay na kini pag-abot.

Adunay upat ka mga samad pinusilan diha sa ulo si Go.

“The suspect went down to surrender the firearm used in killing the victim to the duty gater, J01 Ranel Olaa,” tipik sa natala sa blotter sa Station 5.

Nakuha ang armas nga gigamit ni Heyrana sa pagpusil samtang mirespondi ang mga sakop sa Special Weapons and Tactic (Swat) Team ug Regional Special Operations Group (RSOG) aron sa pagbantay sa dapit.

Wa mahinabi sa mga tigbalita si Jail Warden Supt. Jessie Calumpag ug gidid-an sab ang mga sakop sa media nga makasud sa Mandaue City Jail.

Ang Bureau of Jail Management and Penology (BJMP)7 bag-uhay lang mipahigayon og greyhound operation sa male dormitory sa Mandaue City Jail niadtong Biyernes (Hunyo 15).

Nasakmit ang nagkadaiyang drug paraphernalia, mobile phones, kaha sa sigarilyo, hait nga butang ug sex toy.

Ang sex toy didto sa selda ni Go.

Si Go gibilanggo sa kasong robbery with homicide.

Ang iyang pamilya nanghimakak nga drug lord si Go, apan ang mga awtoridad niingon nga usa ka dakong drug player base sa ilang mga imbestigasyon. /

/ ALAN TANGCAWAN PATAY. Patay nang miabot sa tambalanan si Steve Go, piniriso sa Mandaue City Jail, human giingong gipusil sa iyang kaubang binilanggo tungod sa hantak. Estorya sa pahina 2.