Bag-ong firetrucks sa BFP 7
Lima ka mga bag-ong firetrucks ang gikatakda nga moabot alang sa Bureau of Fire Protection (BFP) 7 karong semanaha.
Ang maong mga bag-ong firetrucks subay kini sa Modernization Program sa tanang mga estasyon sa BFP.
Matod ni BFP 7 regional director Fire Sr. Supt. Samuel Tadeo nga kining mga bag-ong firetrucks ipang-apod apod kini sa dagkong mga fire stations.
Samtang ang kasamtangan nga firetrucks sa hatagan og bag-o ibalhin kini sa fire station nga wala pa’y firetruck.
Dugang ni Tadeo nga sagad sa mga firetruck nga anaa sa mga tagsa-tagsa ka mga fire station mga daan na kini ug lisod na i-repair hinungdan nga angay lang kini sila mahatagan og bag-ong firetruck.
Samtang subay niining modernization program sa BFP, aduna’y laing 200 ka firetruck ang gipalit karon sa ilang Central Office aron ipang-apod apod usab lukop fire station sa nasod.
Gawas niini aduna’y kapin 2,000 ka mga Self-Contained Breathing Apparatus (SCBA) nga ipang-apod apod usab sa mga nagkadaiyang fire stations sa nasod.
Dugang ni Tadeo nga aduna’y 14 ka mga bag-ong fire stations ang gitukod sa Central Visayas diin usa nalang niini ang padayon pa nga gitrabaho.
Usa sa gusto sa director mao ang mapun-an og aerial ladder ang BFP 7 ug mahatag ngadto sa nagkadaiyang dagko nga fire station sa lalawigan sa Sugbo, Bohol, Siquijor, ug Negros Oriental.
Sa kasamtangan, usa lang ka aerial ladder ang anaa sa BFP 7 nga anaa sa dakbayan sa Sugbo ug nipasabot kini nga kinahanglanon kaayo ni karon nga nagkataas na ang mga edipisyo o building sa Central Visayas.
Ang kakuwang sa firetrucks maoy usa sa mga nag-unang problema sa mgasakop sa BFP sa pagtubag sa alarma.