P100 M gipresyo sa Balili property

Kapitolyo nipresyo sa Balili Property og P100 million base sa draft memorandum of agreement (MOA) nga gipadala niini sa kagamhanan sa siyudad sa Naga.

Ang maong dakbayan interesado sa pagpalit sa luna alang sa economic ug industrial use, apan tun-an pa niini ang unod sa MOA.

Nadawat na ni Mayor Christine Chiong sa Siyudad sa Naga ang draft MOA nga gipadala ni Gobernador Hilario Davide III alang sa posibleng pagbaligya sa Kapitolyo sa kontrobersiyal nga Balili Property ngadto sa lokal nga kagamhanan.

Gitug-an sa mayor nga gipresyohan og P100 million sa Kapitolyo ang 24.9 ka ektaryang luna.

Titulado ang 10 ka parcel sa yuta nga naglangkob niini.

Dugang sa mayor, nalakip sa draft MOA ang posibleng pagpabayad niini pinaagi sa installment kun data-data.

Napalit sa Kapitolyo ang Balili Property niadtong 2008 sa presyo nga P98.9 million, apan giingong moabot sa 9.4 ka ektarya niini ang submerged o naa ilawom sa tubig.

Niadtong 2015, nihukom ang korte nga ipauli sa pamilyang Balili ang P37.8 million nga gibayad sa Kapitolyo alang sa submerged area.

Tun-an pa ni Mayor Chiong ang unod sa MOA.

Gihimug-atan hinuon niya ang dakong panginahanglan sa siyudad sa Naga og luna nga magamit isip economic o industrial zone.

Ang administrasyon ni kanhi gobernador ug karong Kongresista Gwendolyn Garcia nipaabuno sa mga tubigan nga bahin sa Balili Property nga maoy hinungdan sa pagpasaka og kaso batok kaniya nilang Davide ug Bise Gobernador Agnes Magpale niadtong 2013 sa Ombudsman.

Sa pagka-karon, anaa na ang kaso sa Sandiganbayan.

Matod ni Davide, iya nang napahimangnuan daan labot niini si Mayor Chiong ug nahibalo na sila sa kondisyon sa luna.