PHOENIX MOLIKAY SA PAGPANAMILIT
Mga duwa karon 4:30 pm- Phoenix batok GlobaPort 7:00 pm- Ginebra batok Dyip
Pagpakabuhi maoy tahas sa Phoenix Fuel Masters sa ilang pagpakigbatok sa GlobalPort Batang Pier sa premirong duwa karong hapon sa Philippine Basketball Association (PBA) Commissioner’s sa Araneta Coliseum.
Ang Fuel Masters, nga gikan sa upat ka sunodsunod nga kapildihan, nagkumbitay sa ika-10 nga dapit dala ang 3-6 nga rekord.
Kon mapilde ang Fuel Masters ning kombatiha, nga maoy premiro sa katapusan nilang duha ka mga tahas sa elimination round, hayan mohawok na sila sa pultahan sa panamilit.
Ang mopatigbabaw lang nga walo human sa eliminasyon mao ang makaabante sa sunod round.
Ang Batang Pier kasamtangang naggunit sa ikalimang luna dala ang 5-5 nga rekord.
Aron magpabiling buhi ang ilang paglaom, ang Fuel Masters kinahanglang modaog ning sangkaa ug hasta sa katapusan nilang duwa batok sa Alaska Aces.
“Hard but doable,” matod ni Phoenix coach Louie Alas.
Nakadistansya man tuod og gamay sa delikadong kahimtang ang Batang Pier apan dili sila angayang molugak gumikan kay ang kapildihan makahatag og dakong kausaban tungod sa kasikit sa standings.
“We have to play consistent, good basketball defensively and offensively versus Phoenix,” asoy ni GlobalPort coach Pido Jarencio.
Ang kombati sa main game tali sa Brgy. Ginebra Gin Kings ug Columbian Dyip grabe sab ka importante.
Ang Dyip kasamtangang nagparada sa ikawalong dapit dala ang 4-5 nga rekord unya sikit nga nagsunod kanila sa ikasiyam ang Gin Kings nga adunay 3-5 nga baraha.
Ning kombatiha, moduwa na sa Gin Kings ang sharp shooter nga si Jeff Chan, kinsa ilang nakuha gikan sa Phoenix pinaagi sa trade. “Jeff obviously fills a big hole for us. His ability to spread the
floor for Greg (Slaughter) and Japeth (Aguilar) could spell the difference,” matod ni Ginebra coach Tim Cone.