Esgana gireklamo og barangay treasurer
Mayor sa lungsod sa Santa Fe, isla sa Bantayan gipasanginlan nga ilegal nga nidakop sa usa ka opisyal sa barangay niadtong Mayo 14, 2018, atol sa barangay ug Sangguniang Kabataan elections.
Si Vicente Ilustrisimo, treasurer sa Barangay Talisay, Santa Fe, nipasaka og mga reklamong administratiba ug kriminal batok ni Mayor Jose Esgana sa Office of the Ombudsman for the Visayas niadtong Hunyo 18, 2018.
Siya nireklamo batok sa mayor og conduct unbecoming of a public officer, grave abuse of authority, grave misconduct, oppression, paglapas sa Code of Conduct and Ethical Standards for Officials and Employees, unlawful arrest, perjury ug paglapas sa Anti-Graft and Corrupt Practices Act.
Apan alang kang Esgana pulitika ang motibo ni Ilustrisimo sa pagpasaka og reklamo batok niya, kinsa iya nang gikasohan nga nakalapas sa Section 261 (e) sa Omnibus Election Code sa piskaliya sa miaging semana.
Ang mayor nisumbalik nga si Ilustrisimo ang ni-harass ug nihulga sa mga botante nga dili mobotar kon dili ang kandidato nga gipaluyohan niini ang botaran.
Si Ilustrisimo nipaluyo sa kandidatura sa incumbent Talisay Barangay Captain Adoracio Cabrera, kinsa kaatbang sa anak ni Esgana.
“...caught by warrantless or citizens arrest at election day... Using his position as treasurer with this groups by putting tent and occupied chairs by his companions,” sumala ni Esgana sa text message sa Superbalita Cebu kagahapon.
Nahitabo ang pagdakop ni Esgana kang Ilustrisimo nga way warrant niadtong Mayo 14, 2018 human maabot ang mayor pasado alas 7 sa buntag sa maong adlaw.
“He was furious and his finger pointed at me...Thereafter, he said “ipa-audit tika ug ang yuta nga inyong napalit nga gitukuran sa Barangay hall wala sa proseso.” I was so scared because I was surrounded by his goons,” saysay ni Ilustrisimo sa iyang tulo ka pahina nga complaint affidavit nga gisangat sa Ombudsman Visayas nga giandam sa iyang manlalaban nga si Judiel Pareja.
Matod niya, nahitabo kini samtang nagpaabot siya sa iyang umagad nga babaye aron ihatod sa polling place aron mobotar.
Si Ilustrisimo gikomprontasi ni Esgana gumikan sa puti nga tent nga gibutang sa agianan padung sa highway sa Sitio Mahayahay, Barangay Talisay.
Si Ilustrisimo gitugyan sa mayor sa Santa Fe Police Station human giingong gihulga niini ang usa sa mga tawo ni Esgana nga si Willy Zonio.
Apan alang kang Ilustrisimo illegal ang gihimo sa mayor kay wa kini warrant ug siya nagtuo nga gibuhat kini ni Esgana aron mosibog kini sa yang suporta alang kang Cabrera.
Dugang sa reklamo nga ang gibuhat ni Esgana nakalapas sa Section 2, Article 2 sa 1987 Constitution ug Article 269 sa Revised Penal Code.
Tulo sa mga silingan ni Ilustrisimo, sila si Christian Cabrera, Wilson Giducos ug Noelito Flores, niduso og ilang affidavits aron pagpaluyo sa reklamo batok kang Mayor Esgana.