Drug free?

Daghan ang nakurat nga gideklarar nga drug-free na ang tanang mga barangay sa isla sa Camotes nga gilangkuban sa upat ka mga lungsod. Kay di pa man dugay nga dunay nangadakpan nga big time drug players nga nag-operate sa mao nga isla. Dili diha-diha o ingon niana kapaspas ang pagkawagtang sa drug users, labina nga ang mao nga isla dunay daghang mga sakyanan sa dagat nga magbiyahian. Nagpasabot nga sayon ang pagpalusot og illegal drugs.

Daghang mga dayo nga magsud-gawas sa mao nga dapit. Kay bisan gani sa gagmay nga mga barangay sa mainland Cebu, naglisod gani ang mga awtoridad sa pagpuhag sa drugas, labina sa gitumbok nga mga drug hot spots, unsa na kaha sa kadako sa isla sa Camotes, ingon niana ba kadali ang pagpapas sa illegal drugs?

Basin maayo nga nakatago ang mga namali ya, di pareho kaniadto nga dayag. Samtang ang mga drug user nangahadlok, nitago na usab og maayo. Ning-adopt sila og mga pamaagi aron di madiskitahan ni bisan kinsa, labina ang ilang pamilya, kahigalaan ug kasilinganan.

Tungod niini, daghan ang di motuo nga dunay mga dapit nga drug-free na kay bisan ang mga lumolupyo, makugang kay nasayod sila nga di kini tinuod.

Bisan kon dunay mga ahensya sa gobyerno nga gitahasan alang sa pagpahigayon sa proseso, apan ang katinuoran gidudahan sa publiko.

Sama gud sa nahitabo sa listahan sa mga durugistang opisyal sa barangay, nga daghan ang naghinamhinam nga ipagawas sa wa pa ang piniliay, apan ang nakapakugang kay daghan ang wa sa lista samtang ang uban, patay na.

Mao nang di na lang unya ikahibung nga sa umaabot nga mga adlaw, dunay madakpan nga mga drug pushers ug users sa mga dapit nga gideklarar nga drug-free.