When summer is gone
Nagtinan-away mig dugay si Raymund. Wa ko makahibawo kon namatikdan ba niya ang hilom kong kalipay nga gibati karon. Wa gyud ko magdahom nga moanhi siya.
“Su’od, Ray.” Morag di madungog ang akong tingog tungod sa gibati kong kahinam sa among panagkita karon.
Sa taas nga sopa nako palingkora si Raymund. Mitapad gyud kog lingkod niya. Gituyo gyud nako nga magkadikit ang isig namo ka lawas. Nabatyagan ko ang kainit sa iyang bukton. Kanunay kong nagpahiyom. Gipaabot ko nga mo-smile si Raymund apan wa gyud. Sukad sa iyang pag-abot seryuso siya.
“Abi kog tua ka na sa siyudad, Ray?”
Ganinang buntag gud nakita ko si Raymund nga nagdalag dakong travelling bag ug misakay og bus. Duol ra sa karsada ang tagsa-tagsa ka resthouse nga among gipuy-an.
“Wa ko modayon. Nahunahuna tika.”
“Nagkaestorya na man ta kagabii. Nananghid ka na man nako nga mouna kag adto sa siyudad?”
“Di pa to igo ang atong pag-estorya, Sofia.”
“D-Di pa igo? Kay ngano man, Ray? Duna ka pay gustong isulti nako?”
Kusog kaayo ang pagbutukbutok sa akong dughan. Naghinam-hinam kaayo ko nga makahibawo sa gusto niyang isulti nako. Dako ang akong pagtuo nga pangulitawhan na ko niya. Love gyud ko niya, Di ko mahimong masayop. Klaro sa iyang tinan-awan ug sinultihan nako.
“Kini na tingali ang katapusan natong panagkita ug pag-estorya, Sofia.”
“H-Ha?” Puwerte nakong kuganga. “K-Kay asa ka man diay, Ray?” Morag gusto kong mohilak sa atubangan ni Raymund.
Miginhawag lawom kaayo si Raymund. Naghuwat ko sa iyang itubag nako. Miduko siya. Naghnuktok unya pagkahuman mitan-aw siya nako.
“Di ba giingnan man tika sa tanan kon nganong nia ko dinhing lugara, kon nganong gusto kong mag-inusara? Duna koy wa isugilon nimo. Di bahin sa akong lovelife ang tinuod nga rason, Sofia. Kondi bahin sa gusto ni Mama ug Papa. Usa ka pari si Papa kaniadto pero migawas sa pagka pari kay nahigugma siya kang Mama. Iyang gipakaslan si Mama. Tulo ming ilang anak. Pulos mi laki ug ako ang kamagwangan. Gusto ni Papa nga ako ang motiwas sa bokasyon nga wa niya tiwasa.”
“You mean, maoy gusto sa imong mga ginikanan ngamagpari ka?”
Na, kaayo na gyung ihilak. (SUMPAYAN)