Suwerte ni Melay
Sa usa ka seminar sa ilang barangay tataw kaayong nabati ni Melay ang pakigpulong sa ilang barangay kapitan nga si Doydoy Bacolod. Natandog siya ug nakahilak.
“Mahala ug panggaa ninyo ang inyong asawa, ug mahalon ug panggaon sab kamo sa inyong asawa. Di gyud kamo mahikalimtan sa matag takna sa inyong kinabuhi!”
Apan kinsa ma’y mahalon ni Melay nga kapin na man sa tuig nga natigbak ang iyang bana. Barangay tanod ang iyang bana nga si Kulas. Kuyog sa kapulisan ang iyang bana misalga sa pag-tukhang sa usa ka adis-adis ug pusher sa ilang barangay. Apan naunsa ba nga nagkayagaw man ang operasyon sa pagsikop sa mga tawong nayabag sa gidiling mga drugas. May nagpinusilay. May nagkaguliyang. Daw may bagang aso nga migabon sa palibot. Dihang nahanaw na ang aso, nakita na lamang nga naghay-ad si Kulas nga naigo sa bala ang bugan niini ug nagkadugo. Maayo gani nga wala mapunting ang “hinagiban” niini, nga sumala pa ni Melay, “Kasagrado niana bisan tuod wa makahatag
og liwat kanako kay inutil sa iyang pagka lalaki.”
Mibiya si Melay sa seminar nga hubog na sab. Nag-inusara na lang siya. Gilingaw niya ang iyang kaugalingon sa pagpabaha sa iyang kinabuhi sa ilimnong makahubog. Inday-hilay siya kaniadto apan giluwas siya sa iyang bana nga mahiligon sa kumbate sa kama. Maayo siyang mokupog sa iyang bana, mao nga gipangga kaayo siya ni Kulas.
Apan may barangay konsehal sa ilang dapit nga naibog kaniya. Si Inting nga usa ka ulitawong guwang ug negusyante. Silingan nila. Sikit ang mga bungbong sa ilang pinuyanan. Dihang nalubong na ang iyang bana sa karaang menteryo sa Carreta, si Inting may gibutyag kang Melay pinaagi sa pasiaw.
“Matay, Melay, mingawon na ko sa imong bana da! Kusog kaayong moagunto matag kaadlawon. Hilom ug mingaw na karon kay wa na siya,” ni Inting.
Wala kadto panumbalinga ni Melay kay si kinsa ba god siya nga itandi kang Inting nga edukado, negusyante ug kaliwat sa banay nga madungganon.
Usa ka gabii, sa hilabihang kahubog ni Melay morag katumbahon siya nga nagsusapinday nga mipauli sa ilang balay. Ug nahisukamod gyud siya sa pultahan sa usa ka balay. May miagak kaniya paingon sa sulod, apan nangatumba sila sa salog. Nawalis ang ubos niyang sapot ug nagisi pod ang tibuok nga bahin niini sa iyang dughan. Midaylang ang kinatibuk-an sa iyang pagka babaye. Gigakos siya sa nag-agak kaniya ug gihagkan. Sa iyang kahidlaw ug kamingaw mibawos siya sa pakigkumbate sa tawo.
Pagka buntag dihang nahigmata na sila, mihunghong si Inting kang Melay, “Pakasalan tika, Melay!” (KATAPUSAN)