Sister teams mag-unay; Dyip batok Batang Pier
Mga duwa karon: (Araneta Coliseum) 4:30 pm. - GlobalPort vs
Columbian DyIp 7:00 pm. - TNT KaTropa
vs. Meralco Bolts
Sister-team man tuod apan kinahanglan nga ihikling una ang ilang panag-inigsuonay sa dihang ang paglabnot sa twice-to-beat nga bintaha maoy anaa sa ilang matag alimpatakan.
Kini ang senaryo nga masaksihan karong gabii sa dihang ang Meralco Bolts mosakbang sa TNT KaTropa sa main game sa PBA Commissioner’s Cup karong gabii sa Araneta Coliseum.
Ang duha nga pulos teams nga ubos sa MVP Group of Companies sa businessman/ sportsman Manny V. Pangilinan ang nagpunting sa Top Two nga lingkuranan.
Sa upat ka sunodsunod nilang kadaugan, ang Bolts ni coach Norman Black nakatabla na karon sa Alaska Aces sa standing, 7-2, alang sa ikaduhang puwesto samtang ang Texters nga nasugamak og duha ka nagkutay nga kapildihan sa mga kamot sa Magnolia ug San Miguel nahagsa sa 6-3 nga baraha.
Tungod niini kinahanglan nga ang KaTropa ni coach Nash Racela modaog sa katapusan nilang duha ka mga duwa - batok sa Bolts ug sa Rain or Shine Painters sa Dominggo aron makapuwesto sa Top two slots.
Hinuon batok sa nagkainit nga Bolts, ang Texters napanglantawan nga panington una og bogbog ning maong panagsangka.
“It’s a critical game on our bid to gain a twice-to-beat advantage in the quarterfinals. We have control of our fate but we have to keep on winning. If we lose, we go down in the team standings as quickly,” matod Black nga nakuhaan og pamahayag sa PBA.ph.
Gituohan nga makadugang og kaikag sa kagabhion mao ang crucial match tali sa Columbian Dyip ni coach Ricky Dandan ug sa GlobalPort Batang Pier sa alas 4:30 sa hapon.
Sa interview, si Dandan mipasabot nga kinahanglan kalimtan nila sa hingpit ang ilang dakong kapildihan sa Ginebra sa niagi nilang duwa.
Mao usab kini ang tuyo ni GlobalPort coach Pido Jarencio kinsa gilubong usab sa Phoenix Petrolium sa uwahi nilang duwa.