KONSEHAL SA CALAMBA GIPUSIL, KRITIKAL

Outgoing nga konsehal sa Barangay Calamba, siyudad sa Sugbo, gipusil sa wa pa mailhing gunman pasado alas 6 kagabii sa sitio Mahayahay samtang usa usab ang naangin.

Ang biktima giilang mao si konsehal Edelbrando Ygoña, kinsa nakaangkon og samad pinusilan sa lawas samtang ang naangol giila usab nga si Rowena

Pepito, 38, taga dan A. Lopez.

Sa pagsuwat ning taho, naa sa kritikal nga kahimtang si Ygoña sa usa ka pribadong tambalanan. Duna siyay samad pinusilan sa agtang ug ang bala nilapos sa tangkugo.

Wa pa matino asa naigo si Pepito sanglit dali ning gidala sa Cebu City Medical Center.

Matod ni Chief Inspector Allan Rosario, hepe sa San Nicolas police station sa Cebu City Police Office, nga usa lang ang mamumuno nga nipusil kang Ygoña pipila ka metros gikan sa iyang balay.

Daghan matod pa ang nakasaksi tungod sa kadaghan sa mga tawo sa maong lugar, apan way bisan kanila ang nihatag og impormasyon.

Anggulo sa drugas ug personal nga motibo ang gitan-aw karon sa mga imbestigador.

Matod ni Rosario nga aktibo sa kampanya batok sa illegal nga drugas si Ygoña.

Gani siya ang kanunay nga mopirma sa mga imbentaryo sa mga nakuhang drugas sa kapulisan kon sila molusad sa ilang anti drug operation sa Barangay Calamba.

“Very active ni siya sa campaign against illegal drugs nato. Sya ra man permi. Halimbawa naay dakop ang tropa, siya permi matawag mo witness sa inventory. Very active gyud sya,” matod ni Rosario.