133 na ka tambay ang nasita sa Mandaue City police

Mokabat ngadto sa 143 ka mga tawo ang gibadlong sa Mandaue City Police Office (MCPO) nga di magtambay panahon sa kagabhion nunot gipatuman niini nga Oplan Tambay Sita sukad niadtong Martes hangtod kagahapon.

Sa operasyon sa MCPO kalabot sa maong kampanya, laing 40 ka mga na-rescue mga minor samtang ang 17 niini nakalapas sa mga nagkadaiyang ordinansa sa dakbayan.

Ang mga 17 ka mga nakalapas sa city ordinance sama sa drunkenness, anti-dispatching, unjust vexation ug uban pa gipamulta na sa MCPO.

Samtang ang mga menor nga na-rescue sa kapulisan, gi-turn-over na sa kapulisan ug gipahibalo na ang mga ginikanan kalabot sa curfew.

“This time, our government is serious in implementing city ordinance. Ang purpose nito, ang maganda rito is ma-reduce yung crime rate, it is crime prevention, deterrent at the same time mababawasan yung mga petty crimes na mangyayari,” ni PSSupt. Roberto Alanas, hepe sa MCPO sa dihang nahinabi sa Superbalita Cebu kalabot sa maong lakang.

Dugang niya nga sagad rason sa mga nasikop ilabi na ang mga menor mao ang pagkuyogkuyog sa magbarkada.

Nanghinaot si Alanas nga moabag sa kapulisan ang tanang mga barangay sa dakbayan mahitungod sa maong kampanya sanglit di tanang mga dapit ug suok maabtan sa mga pulis apan maabot sa mga tanod.

“We are expecting cooperation sa mga barangay kase unang-una meron tayong mga pulis na binibigay sa kanila, pulis sa barangay kase karamihan diyan ang mga sulok-sulok di na madaanan ng pulis diyan so meron naman silang mga tanod dun,” ni Alanas ning mantalaan.

HANGYO

Palihug abagi mi.

Mao ni ang hangyo sa mga police officer gikan sa Cebu City Police Office (CCPO) sa publiko sa ilang pagpahigayon sa Oplan Tambay tambay sa nagkadaiyang mga dapit.

Si PO2 Christian Putalan, Police-Community Relations personnel sa Waterfront Police Station, niingon nga atol sa ilang roving operations, sagad matinahurong motimbaya kanila ang mga estambay sa Barangay Tejero ug dapit sa pantalan.

Karon sa mga pamahayag nila ni Presidente Rodrigo Duterte ug Philippine National Police (PNP) Chief Oscar Albayalde batok sa mga libudsuroy sa kadalanan, naglaum si

Putalan nga ang mga tambay makigtambayayong kanila.

“We hope that they would heed our call. We will talk to them properly,” siya nagkanayon. Gikan sa Huwebes sa gabii ngadto sa Biyernes, ang CCPO nipahimangno ug nipapauli sa 45 nga nakalapas, mga menor o naa sa legal age, naghukas sa publiko, nag-inom sa publikong lugar ug nagmugnag kasamok samtang hubog.

Ang Oplan Tambay (Tangtangon Ang Maabusado, Badlongon sa Katilingban ug Apil niini ang mga Yawan-ong buhat) sa CCPO gitumong batok sa mga libud suroy gikan sa kadalanan.

Gigamit sa kapulisan ang mga balaud ug ordinansa sa smoking ban, balaud batok sa anti-drunkenness, illegal dispatching, curfew, anti-noise law ug balaud sa vandalism.