Mayor Osmeña uyon sa plano sa PDEA sa pag-drug test sa mga tinun-an, mga magtutudlo

Dakong uyon si Cebu City Mayor Tomas Osmeña sa pagpatuman sa Philippine Drug Enforcement Agency (PDEA) sa mandatory drug testing alang sa mga tinunan ug magtutudlo dinhi sa dakbayan sa Sugbo.

Sigon pa niya nga iya kining tugotan kay ang paggamit sa gidiling drugas nisakop na sa tanang klase sa katilingban, dili lang mga tambay ang maggamitan niini kon dili lakip na ang ubang tawo nga adunay propisyon.

Gibutyag ni OSmeña nga andam nga motabang ang kagamhanan sa Sugbo sa PDEA7 sa mga posibling gastuhanan para sa maong drug test.

Aduna sab siyay tambag alang sa mga magtutudlo, "We have to be very careful for the competence of our teachers .... you cannot help your child and attend the class in the whole year only to find out the teachers are adis-adis and could not teach properly.”

Una niini, nipahibalo si PDEA Director Aaron Aquino sa malangkobon nga operasyon kauban ang Dangerous Drugs Board (DDB) ug sa Department of Education (DepEd) alang sa posible nga mandatory drug testing sa mga estudyante gikan sa grade 4 ug pataas.

Gipanalipdan sa PDEA 7 ang tinguha sa ilang labaw nga ipaubos sa drug test ang mga tinun-an sa elementarya hangtod sa high school lakip na ang mga magtutudlo.

Kini nunot sa impormasyon nga nadawat nga aduna nay mga bata karon ang miangkon nga tiggamitan na sa illegal nga drugas nga nakapaalarma na sa awtoridad.

Matod ni Leia Albiar, information officer sa PDEA-7, nga dinhi sa Central Visayas adunay mga nag-edad og 7 anyos ang miangkon na nga nigamit sila og illegal nga drugas tungod sa impluwensya sa mga barkada ug nakita mismo sa iyang mga ginikanan.

Gipasalig hinuon sa PDEA-7 nga kon mahinayon ang maong tinguha sa ilang labaw nga ipaubos na ang tanang tinun-an ug mga magtutudlo sa drug test, dili kini mapublikar ug way silot ipahamtang.

Matod ni Albiar, nga ang buhaton sa ahensya nga tahasan niini mao ang pagpaubos sa counseling sa bata ug sa inahan ug pasabton unsay sangputanan sa usa ka tawo nga maadik na sa paggamit sa illegal nga drugas.

Usa sa katuyoan niining maong plano mao ang paghatag og proteksyon sa mga bata nga motungha sa ilang tagsa-tagsa ka eskwelahan sa pamasin nga naa ra sa sulod o duol ba kaha sa tunghaan ang nagpayuhot sa illegal nga drugas.

“Ang proseso kung sa high school naay mag-positive, dili man na for sanction, ipaubos sa counseling ang bata unya iapil ang parents, kay para matugkad unsay source sa iyang drug problem,” matod ni Albiar.