Kurapsiyon sa mga prisohan

Dili gyud ko makatuo nga dili masumpo kining pagpalusot og illegal nga drugas ug kontrabando sulod sa atong mga jail facilities kon magtinarong lang ang atong mga jail officials ug personnel. Estrikto kaayo ang pamaagi sa inspeksiyon sa mga jail facilities sa mga mobisita sa mga piniriso apan nganong aduna man gihapoy makalusot nga mga kontrabando?

Tanang mga pamaagi sa pagpalusot og drugas sa jail nahibaw-an na sa atong mga jail officials. Kanang mga illegal nga drugas nga anha isulod sa kinatawo sa mga babaye, dugay na kanang modus. Daghan nang nadakpan niana. Gani karong bag-o tulo ka mga babaye ang nadakpan sa mga tinugyanan sa Cebu City Jail human sila misuway pagpalusot og drugas nga gisulod sa ilang kinatawo. Dakoa siguro nang ila no? Morag kuweba.

Kanang ‘bombing ug fishing’ o paglabay sa mga butang gikan sa gawas ug pagtuntun sa mga kontrabando, nganong dili man kana masumpo nga makita man mismo sa mga jailguards. Kon adunay mosuway, aw, pusilon sama sa nahitabo sa Cebu City Jail niadtong miaging semana. Patay lagi. Siyaro og dili motagam. Tan-awa karon, wala na.

Diha sa Mandaue City Jail nganong dili man gyud mahunong ang pagpalusot og drugas? Sa dihang buhi pa ang kontrobersiyal nga binilanggo nga si Steve Go, siya maoy gipasanginlan nga maoy tigpalusot og drugas. Sige og greyhound operation ang mga jail officials unya naa gyoy makompiskar. Nakapalusot man gani og armas de fuego si Go. Karon nga gipatay si Go, naa man lagi gihapon mga kontrabando ang nakasulod.

Ang hinungdan ning tanan kurapsiyon gyud. Kay ang atong mga jail officials madala man og suburno sa gustong magpalusot og illegal nga drugas og kontrabando sa sulod bugti sa dakong kantidad. Hangtod nga dili magtinarong ang mga jail personnel, dili pod mahunong ang mga binoang sa atong mga jail facilities.

Tanang mga pamaagi sa pagpalusot og drugas sa jail nahibaw-an na sa atong mga jail officials.