When summer is gone
Gikasakit gyud nako ang pagsulod ni Raymund sa seminaryo. Bisag one month na ang milabay apan nia pa gihapon sa akong dughan ang kaguol. Nahigugma ko kang Raymund, apan di kay ako ra. hasta sab siya nahigugm nako. Na-feel ko nga true love ang iyang gibati nako. Dunay baroganan si Raymund, mao kini ang nakita ko sa iyang pagka tawo.
Di parehas kang Israel nga way baroganan.
Kon way klase, di ko ganahang mogawas sa balay. Anha ra ko sa akong kuwarto. Magbasa-basa og mga pocketbook. Daghan kog collection nga mga pocketbook. Dunay iningles, tinagalog. Ug may binisaya sab. Hobby na nako ang pagbasag pocketbook. Malingaw kaayo ko ani.
Kon hapon na, anha ko sa among lawn. Magtabyug-tabyog ko sa lingkoran kong swing.
Maglantaw sa layo. Morag naghuwat ko sa pagbalik ni Raymund. Apan imposible na kining mahitabo. Sa akong nahibaw-an, komportable na si Raymund sa seminaryo. Dunay nagsulti nako, suod nga sakop sa pamilya ni Raymund nga kaila ko sab, nga nag-ingon si Raymund nga destiny gyud niya ang pagka pari kay malipayon siya sa iyang nahimutangan karon.
Unsay angay kong buhaton? Magpabilanggo ba gyud ko sa gugma ko kang Raymund? Mao kini ang kanunay kong gihunahuna. Di gyud tingali para nako si Raymund, ug ako di sab alang kaniya. Kon magpabilin kong mahigugma kang Raymund, mahimo kong karibal sa Ginoo.
Di kini angay mahitabo. Ug sa pagpanglabay sa mga adlaw, nadawat ko na ang nahitabo sa ikaduha kong gugma. Naka-move on na ko. Nakadesisyon ko nga ang akong pag-eskuwela lang ang akong hatagan sa dako kong pagtagad. Dunay mga lalaki nga nasabtan ko nga gustong makigsuod nako. Apan naglikay ko nila.
Nahadlok ko nga masakitan na sab. Apan wa kini magpasabot nga hingpit ko nang giserad-an ang akong kasingkasing sa paghigugma pag-usab. No. Naglikay lang una ko karon sa mga lalaki.
I know, someday mahigugma ko pag-usab. But not now. Presko pa sa akong dughan ang kapakyasan sa akong gugma ngadto kanila ni Israel ug Raymund. Di ko gusto nga mapun-an pa ang gibati kong frustrations sa akong lovelife.
Usa ka gabii, nakugang ko sa pagpamisita ni Israel nako.
(TAPUSON SUNOD GULA)