When summer is gone
Puwerte nakong lagota pagkakita kang Israel. Ako ang nag-abli sa pultahan dihang dunay nanuktok. Ug ang kanahang dako mao diay ang nahiabot.
Gitinighawakan ko si Israel. Hapit ko na lang siyang tulisukon. “Kabaga gyud nimog nawong, no? Nakaako ka pa uroy sa pagpakigkita nako!”
“I have something to tell you, Sofia.”
Nag-iningles pa ang kanahang dako. Aw, makamaong moiningles si Israel bisag high school graduate lang siya. Bright tingali siya sa klase.
“Unsa may imong tuyo? Sulti dayon kay katulgon na ko!”
Wa na makatubag si Israel kay misulod sa sala sila si Mama ug Papa. Gikan sila sa ilang kuwarto.
“Uy, nia ka man diay, Israel?” Nahibulong ko kang Mama kay malipayon kayo siya. Hasta pud si Papa, nagpahiyom.
“Nganong wa man nimo siya pasudla, Sofia. Sa sala mo pag-estorya?”
Igo na lang kong mitando kang Papa. Dihang nakasulod na si Israel, gipalingkod siya ni Mama.
“Sige, ha, Israel, Sofia, pag-estoryahay mo pag-ayo.”
Nagkinidhatay sila si Mama ug Papa. Misamot ang akong kahibulong sa kalit nga kausaban sa akong mga ginikanan. Puwete man nilang lagota pagkahibawo nila nga boyfriend ko si Israel. Gihatagan man gani nilag dakong kuwarta si Israel aron magpalayo na nako. Ug karon, nganong malipayon man silang duha.
“Unsa ba gyuy tuyo mo nako, Israel?”
Nagpanudlo ko sa nawong ni Israel samtang nagtindog ko sa iyang atubangan. Ang karaho, morag wa lang magtagad sa akong kasuko niya.
“Giuli ko sa imong Mama ug Papa ang tseke nga ilang gihatag nako, Sofia. Na-realize ko nga di kabayrag kuwarta ang dako kong gugma nimo.”
Wa ko makatingog. Mikalit kakusog ang pinitik sa akong kasingkasing. Nakatan-aw kog dugay kang Israel. Ug mao na lay akong namatngonan nga mitapad na kog lingkod niya sa taas nga sopa nga iyang gilingkoran.
“Mao na ang tinuod, Sofia. Di ko mahimong ibaligya ang love ko nimo. Mao nga nia ko karon, nagpasabot nimo. Gani, mituo na sila si Mama ug Papa nimo sa tinud-anay kong pagmahal nimo. Ila kong gipaeskuwela, Sofia. Sila ang mogasto nako sa college hangtod nga makahuman ko.”
Wa na ko makabalibad dihang gikuptan ni Israel ang usa ko ka kamot.
Nakasandig ko sa iyang dughan. (KATAPUSAN)