UC MIPILDI SA USC; 4-0 NA

Ningdikit na sa ganghaan sa finals ang University of Cebu (UC) Webmasters human nila gipangmakmak ang University of San Carlos (USC) Warriors, 77-63, kagahapon sa Cebu Schools Athletic Foundation Inc. (CESAFI) 2018 Partner’s Cup college division sa Cebu Coliseum.

Ang Webmasters ni coach Raul “Yayoy” Alcoseba mirehistro sa ikaupat nilang sunodsunod nga kadaugan sa samang gidaghanon nga mga duwa aron paamagon og maayo ang ilang poruhan sa finals.

Sa ilang bahin, ang Warriors wala na’y poruhan nga makapuwesto sa finals human sila nasukarap sa 2-3 nga record.

Nagbangis og maayo ang import sa Webmasters nga si Fredrick Elombi ug nagpakatap kini’g 32 puntos aron pangulohan ang kadaugan.

Gikan sa sikit nga kombati sa 1st half, hinayhinay nga nagpalayo ang Webmasters sa pagpangulo nila ni Elombi ug Justine Dacalos hangtod nga nakaposte sila og 63-45 nga labaw sa nahabiling kapin sa upat ka mga minutos.

Ning-askyon paggukod ang Warriors ug napahak nila ang labaw sa Webmasters ngadto sa pito na lang ka mga puntos, 63-70, sa nahabiling 1:13 minutos.

Apan human niini, nagkumboya sila si Elombi ug Dacalos aron pasutuyon og balik ang opensa sa Webmasters paingon sa 14 puntos nga kadaugan.

Sa premirong duwa, gipatapsingan sa USC Baby Warriors ang UC Baby Webmasters, 58-56.

Ang Baby Warriors ningsaka sa 2-3 nga rerord samtang ang Baby Webmasters nahagsa sa 2-1 nga baraha.