UC, Yayoy nagpanikad sa Bayugan City
Malaumon ang Phoenix Fuel Life-University of Cebu (UC) Webmasters kabahin sa ilang poruhan sa 8th Mayor Kim Lope A. Asis Invitational Basketball Tournament nga gikatakda karong Hunyo 2629 sa Lope Asis Memorial Gymnasium sa Bayugan City, Agusan del Sur.
Nagkanayon si Webmasters coach Raul “Yayoy” Alcoseba nga nagpanikad ug taas ang ilang moral sa ilang pag-asdang sa Bayugan City gumikan kay nakapangandam sila og insakto tungod sa kasamtangang nagpadayon nga Cebu Schools Athletic Foundation Inc. (CESAFI) 2018 Partner’s Cup.
“Ang atong preparasyon sa Bayugan mao na sab ning sa Partner’s Cup. We need to win one ra man sa atong bracket to have a chance to advance in the semis, mao ni ang atong target,” matod ni Alcoseba, kinsa usa ka multi-titled coach sa Sugbo.
Ang Webmasters nahiluna sa Bracket A kauban ang laing Cesafi team nga Mair Construction-Southwestern University (SWU) Phinma Cobras ug Vincare Pharma-University Sto. Tomas (UST) Growling Tigers sa Manila.
Naglangkob sa Bracket B mao ang Madyaw Construction-National University (NU) Bulldogs ug ARQ Builders-Lyceum Polytechnic University (LPU) Pirates sa Manila hasta ang Greene Builders/Xavier University-Ateneo de Cagayan Crusaders.
Ang mopatigbabaw nga duha sa matag grupo human sa single round robin mao ang makaabante sa crossover semi-finals.
Ang modaog sa cross-over semis maoy usab ang magsangka alang sa championships.
Ang kampiyon sa torneyo makaangkon og P200,000, makadawat og P150,000 ang 2nd placer, P100,000 sa 3rd placer, P75,000 sa 4th placer samtang P50,000 sa 5th placer.
“Nakaduwa na man ta sa Southwestern pero sa UST wala ko’y idea but I think mga bag-o sab na ang ilang players. Nag-focus lang sab mi pagsulod sa semi-finals then tan-awon nato,” dugang ni Alcoseba.
Ang Webmasters ningdaog sa nag-una nilang tulo ka mga duwa sa Partner’s Cup ug usa sa ilang gipangbiktima mao ang Cobras, 86-74.
Ang Webmasters magsalig og maayo sa ilang import nga si Frederick Elombi, Jan Jabello ug veteran guard Justine Dacalos.