TINDAHAN SA MOTOR PASIRHAN

KON MAPAMATUD-AN KINI ANG NAKALANGAY SA LTO REGISTRATION

Bayaran ni Mayor Tomas Osmeña ang penalty sa mga driver sa bag-ong motorsiklo nga walay rehistro nga masikop sa Land Transportation Office (LTO-7) dinhi sa dakbayan sa Sugbo.

Apan iyang i-waive ang administrative fine kon ang makasikop kanila mao ang mga enforcer gikan sa Cebu City Transportation Office.

“If you are caught anywhere in Cebu City for not having registration for your new motorcycle, we will waive your fine.

If you are caught by an agency not under Cebu City such as LTO, I will pay for your fine myself,” tipik sa saad ni Osmeña nga naka-post sa Facebook.

Ang maong pamahayag nga gipatik sa Facebook page sa mayor nitumaw human sa iyang pagpatawag og meeting sa 15 ka mga dealer og motorsiklo sa siyudad diin iyang nahibaw-an nga moabot og 4 ka buwan ang pagpaabot sa mga nakapalit sa motor sa di pa mogawas ang rehistro.

Nahibaw-an usab sa mayor nga dugay moduso sa mga papeles ang mga motorcycle

dealer sa mga dokumento ngadto sa LTO-7 hinungdan sa pagkalangay.

Si Osmeña nibahad ngadto sa mga motorcycle dealer kinsa dili mohatag og prayoridad sa ilang mga kliyente aron madali ang pagproseso sa ilang mga rehistro sa pagpasirado sa ilang establisemento.

“I have also issued an ultimatum to those motorcycle dealers that delay the submition of registration papers to LTO,” pasidaan ni Osmeña nga sirhan ang maong mga tindahan.

Samtang, gipadayag ni Director Vic Caindec sa LTO-7 nga nagpadayon sila sa ilang operasyon hilabi na ang pagpanakop sa colorum nga mga sakyanan.

“Ang atong operation never gyud ta mo-single out og motor or sakyanan kay ang atoang

policy has always been no registration no travel on any type of vehicles,” matod ni Caindec. Iyang giasoy nga niining bag-o, nakadakop sila og mga four-wheeled vehicle lakip na ang coaster nga gipalit og cash sa tag-iya og namasahero nga walay LTO registration.

Ang multa sa motorsiklo nga walay registration moabot ngadto sa P13,000. /