Way gustong makig-tandem ni Tomas?

Wala pa makapili og running mate si Mayor Tomas Osmeña, onse ka buwan sa dili pa ipahigayon ang midterm elections sa tuig 2019.

Ang mayor nipabuhagay nga way gustong makig-tandem kaniya ug iyang gipahibawo nga abli ang Bando Osmeña Pundok Kauswagan (BOPK) ngadto sa gustong magpapili kinsa kwalipikado sa pagka-bise mayor.

“No, I’m open. No prospects, nobody likes to run with me,“tubag ni Osmeña uban sa pagbutyag nga ang iyang kanhi running mate nga si Nestor Archival iyang padaganon og balik isip konsehal.

Ang iyang asawa nga si Konsehal Margarita Osmeña kinsa anaa na sa katapusang termino dili na usab magpapili og posisyon sa gobiyerno, dugang sa mayor.

Ang mayor nikomedya pa dihang iyang nakita si Raquel Arce, pangulo sa Prevention Restoration Order Beautification Enhancement (Probe) dihang padung siyang nisakay sa elevator nga iyang himuong runningmate gumikan sa maayong performance nga gipakita sa kanhi market administrator.

Si Arce giplanohan ni Osmeña nga himuong assistant City Administrator ug mangulo para motaas ang koleksyon sa buhis sa dakbayan ug mao sab ang iyang himuong pangulo sa pagsusi sa mga business establishment ug kon masuta nga wa magbayad og buhis iyang pasirad-an pinaagi ni Arce.

Samtang, nakasugat usab og problema ang grupo sa kaatbang sa administrasyon sanglit hangtod karon wala pa usab sila makapili og si kinsa ang moatbang ni Osmeña sa pagka-mayor sa siyudad sunod tuig.

Si Bise Mayor Edgardo Labella, presidente sa PDP-Laban, nagkanayon nga ila pang hisgutan sulod sa ilang partido kon si kinsa ang angay nga iindurso.

Ang bise mayor nibutyag nga abli ang iyang posibilidad sa pagpapili sa pagka-mayor apan si kanhi Mayor Michael Rama nipadayag usab sa iyang pagdagan.

Apan gipadayag ni Labella nga ang sigurado nga dili mabungkag ang ilang grupo ug maghiusa sila aron ilang atbangan ang BOPK.

Ang filing sa Certificate of Candidacy karong Oktubre na sa dili pa ang eleksyon sa buwan sa Mayo. sunod tuig.