700 taxi wa mopaubos sa calibration: LTFRB 7

Aduna pay kapin sa 700 ka taxi units sa Sugbo ang wa pa mapaubos sa calibration, testing ug sealing ang mga metro sa Land Transportation Franchising and Regulatory Board (LTFRB) sa Central Visayas.

Matod ni LTFRB 7 director Ahmed Cuizon nga hayan kini nga taxi units ang uban kay daan na ug nagyaka na lang ug wa makapalit og bagong units ang operator aron ihulip niini.

“Ang uban sad tingali naalkanse sa industriya sa transportasyon maong niundang,” sumala sa director sa pakighinabi sa Superbalita Cebu kagahapon.

Sa 6,077 ka taxi units sa Sugbo nga narehistro sa LTFRB 7, moabot sa 5,324 ang na-calibrate, na-testing ug naselyohan na ang mga met- ro sukad niadtong Pebrero ug nakakolekta na sa gipausbawan nga pletihan, P40 nga permanente nga flag down rate, P13.50 sa matag kilometro, ug P2 matag minuto nga waiting time.

Niadtong Hunyo 15, napupos ang gihatag nga tagal sa buhatan sa mga operator alang sa pagpa-calibrate, testing ug sealing sa ilang taxi units.

Si Cuizon nibutyag nga ang napakyas pagpa-calibrate sa mga metrohan sa taxi sud sa gitakda nga panahon kay pabayron na og penalty nga P200 sa matag unit sa matag adlaw ang operator.

Siya namahayag mahimo mo-substitute ang operator sa ilang daang units ug bag-ong sakyanan basta motuman kini sa Omnibus Franchising Guidelines sa ilang buhatan.

Ang usa ka taxi unit di mahimo i-calibrate kon di butangan og closed-circuit television (CCTV) camera, dashboard camera, global position system (GPS) ug libre nga wi-fi.

Si Cuizon nidugang nga nahuman na usab sila og calibrate, testing ug sealing sa 30 ka taxi units sa Tagbilaran, Bohol.