Mga palahubog, tambay sa Cordova nagbag-o na?

Mga palahubog ug istambay sa lungsod sa Cordova kalit nga nagbag-o sa dihang way bisan usa nga nadakpan ang Cordova Police Station sa dihang gisugdan sa pagpatuman ang Oplan Tambay.

“Siguro naka-update (balita) sila sa operation. Nangawala naman?,” tipik sa pamahayag sa hepe sa Cordova Police, P/ SInsp. Janus Giangan.

Gihulagway ni Giangan nga sa wa pa ipatuman sa operasyon batok sa mga istambay di ikalimod nga adunay mga magtagay ug ilimnong makahubog daplin sa karsada ug adunay maglaroylaroy sa karsada bisag lawom na nga kagabhion.

Gibase sab sa kapulisan ang pagsikop niadtong nakalapas sa gipatuman nga ordinansa sa Cordova sama sa curfew, cut-off time sa mga internet café ingon man ang mag-inom daplin sa karsada.

Gitug-an sa opisyal sukad sa miaging semana aduna silay na-rescue nga mga 20 kapin kon kuwang ka mga menor de edad nga naatlan sa alas 10 sa gabii nga curfew hour ,

Kadtong mga ginikanan nga di makabadlong sa ilang mga anak ug nagbalikbalik sa paghimo sa kalapasan ang makabayad og P2,000 nga multa base sa ordinansa.

Nagkanayon si Giangan nga pinaagi sa Oplan Tambay nakatabang kini nga maminusminusan ang mga laagan nga sagad maoy hinungdan sa gang ug riot, kapanalipdan sab kadtong mga batan-ong mga babaye diin adunay pipila nga bisag lawom nang gabii nagyangpungad pa sa gawas.

Panawagan sa kapulisan sa Cordovahanon nga aron mapabilin nga malinawon ang ilang lungsod siya nanghinaot nga badlungon sa matag ginikanan ang ilang mga anak nga di mag-istambay sa gawas.

Samtang kadtong di makalikay sa pag-inom og ilimnong makahubog himuon na kini diha sud sa ilang balay ang tagay aron malikay sa kagubot nga moresulta na hinuon sa krimen.

Ang Lapu-Lapu City Police Office adunay 13 ka menor de edad nga na-turn over sa ngadto sa barangay diin sila nasakop sa dihang gipatuman ang kamanduan ug pabilin nga zero niadtong mga hamtong nga maatlan nga mag-inom sa mga publikong lugar, kini base sa accomplishment report niadtong Hunyo 22– 23.