PAGDISKARGA SA BUGAS NALANGAY

Gumikan sa di maayong panahon, naapektuhan ang pagdiskarga sa sinakong mga bugas sa National Food Authority (NFA) sa Cebu International Port, siyudad sa Sugbo.

Si Olma Marie Bayno, information officer sa NFA 7, nibutyag nga nahunong kagahapon sa udto ang pagdiskarga sa sinakong mga bugas tungod kay madag-umon ang kalangitan ug delikado madaut ang bugas kon mauwanan.

Hangtod alas 12:30 sa udto kagahapon, 50,000 na ka mga sako sa NFA rice gikan sa 200,000 ka mga sako ang nadiskarga sukad sa miaging semana nga luwan sa MV Vina Gold nga gikan sa Vietnam ug gipahi- luna sa bodega sa buhatan.

Matod ni Bayno nga gihikay na usab ang gikinahanglang mga dokumento alang sa pagdiskarga usab sa 140,000 ka mga sinakong bugas nga sakay sa ikaduhang barko, BMC Alpha, nga gikan usab sa Vietnam nga nag-angkorahe karon sa kadagatan nga sakop sa siyudad sa Talisay.

Kinatibuk-ang 25,000 metric tons sa bugas ang gitagana alang sa Central Visayas nga giaprobahan sa NFA council niadtong Pebrero.

Ang dugang 8,000 ka metric tons sa bugas ang luwan sa ikatulong barko nga gikan sa Thailand kay unang modunggo sa Iloilo aron pagdiskarga sa 4,000 metric tons.

Si Joey Figuracion, weather forecaster sa Philippine Atmospheric, Geophysical and Astronomical Services Administration (Pagasa) Visayas niingon nga ang intertropical convergence zone (ITCZ) maoy nakaapekto sa Kabisay-an karon nga nagdala og hinay ngadto sa kasarangan nga paguwan sa Sugbo nga masinati hangtod karong adlawa.