DAGAN HUMAN SA KAPAKYASAN
Human nahagba ug napakyas ang event management nga negosyo ni Jonathan Dungog niadto, iyang gigamit ang pagka-aktibo sa bisan unsang matang sa paugnat sa kusog aron makabangon.
Matod sa 39 anyos nga lumad sa Catarman, lungsod sa Liloan, nga kon di pa siya hilig mobansay o mopasingot, di na gyud unta siya makatungtung sa iyang nahimutangan karon.
Nailhan si Dungog dinhi sa Sugbo di lang sa pagka-runner, apan kanunay siyang atangan sa mga mosalmot ug mga motan-aw sa mga running events tungod sa kabongga sa sul-obon niini nga costume bisan og nagdagan.
Mga sinulog-inspired o Cebu-inspired costume ang sul-ubon ni Dungog sa mga kompetisyon sama sa Cebu Marathon ug Ironman.
Lahi siya sa ubang mga atleta, di competitive si Dungog susama sa uban nga pugson gyud ang lawas aron lang nga maka-abot sa target nga oras sa finish line.
“I joined running events because I want to be healthy. I don’t wanna die sa running event. Di katulad ng iba na mamugos gyud because they have a target time. Ako, I’m enjoying the sports that I am joining. Hindi ko magpa-pressure
sa time, bahala kayo. I will run as much as I can, and I’ll make
sure na maganda ako sa finish line, naka-smile ako sa finish line hindi yung ako mag-collapse sa finish line, dapat maganda ang picture ko,” ni Dungog sa dihang nahinabi sa Superbalita Cebu.
Dugang pa niya nga di kinahanglang gub-on sa mga mosalmot og kompetisyon ang konotasyon sa isports nga maglingaw, alang sa imong healthy
lifestyle ug maka-exercise. Sumala niya nga kini ang iyang kanunay pahimangno sa iyang mga higala nga di pugson ang lawas nga magsuka, makuyapan ug mobati ang nawng sa finish line.
Multi-athlete
Sa wa pa nadisgrasya sa usa ka triathlon event si Dungog sa milabayng tuig, tag-duha o tulo ka mga event iyang salmutan matag buwan.
Paambit niya nga nihinay siya og salmot og kompetisyon ning tuiga nunot sa trauma sa disgrasya.
Nag-ugat ang iyang kamahiligon sa isports sa dihang kini nahimong iskolar sa track and field sa De La Salle University sa Manila pag-high school ug pag-college niini sa De La Salle–College of St. Benilde.
Human migradwar sa kursong business management niadtong 2001, nanimpad si Dungog isip gym instructor
sa Dubai ug didto, iyang gisuwayan ang ubang mga klase sa paugnat sa kusog aron magamit niya ang ubang libreng oras para makakwarta.
“I don’t stop in one sport. I wanna make sure nga tanang sports kaya kong pasukin except basketball. I teach boxing, kick boxing, yoga, tai chi, almost everything except sa basketball,” ni Dungog. Gikan sa marathon, ultra-marathon, Ironman, trail running, 160 KM ug 260KM nga mga dagan, nasalmutan na ni Dungog.
Sumala niya nga human siya nakasuway og mga extreme sports, di na siya ganahan nga mosalmot pa og mga ginagmay nga events.
Alang ni Dungog, nakakat-on siya nga mamahimong maayong time manager sa iyang pagka-aktibo sa isports
alang sa iyang training.
Gawas sa pagkaon og sakto, sigun ni Dungog nga ang laing natampo sa isports kaniya mao ang paglikay sa drugas ug uban pang mga bisyo. “You can really avoid drugs,
and then I don’t smoke man gud. Really, ma promote man ang healthy living na. Daghan kang mahimo nga thing nga di kaya ng ibang tao. Self-discipline gyud siya eh,” ni Dungog. Gibutyag niya nga nitaas sab iyang confidence level tungod niini ug mas giampingan niya iyang kaugalingon.
“I feel like I’m totally different and I can feel like I’m really on top of everything. I know whatever challenges na ibigay,
kaya na nako. Failure for me is very impossible na. Like if I fail I know I can get up,” ni Dungog kalabot sa pagkalugi sa negosyo niadto. /