ULO GIPASOK SA TAMBUTSO
Napasok ang ulo sa usa ka batan-ong babaye ngadto sa tambutso sa sakyanan apan gidakop siya sa kapulisan sa iyang gihimo.
Di malikayan nga kon makainom sa ilimnong makahubog sudlan ang mga binuang ug lakip niini ang gihimo sa 19 anyos nga si Kaitlyn Strom diin iyang gisuwayan kon masud o di ang iyang ulo sa tambutso sa trak.
Ning iyang gihimo, si Strom nakadiskubre nga masud ra diay ang iyang ulo sa tambutso apan ang lisod kon unsaon niya sa paggawas niini.
Ang taho sa mirror.co.uk nagtumbok nga napasok sud sa 45 minutos ang iyang ulo atol sa Winstock Music Festival sa Minnesota ug milampos sa paglingkawas niini dihang miabot ang kabomberohan diin migamit “electronic” gabas.
Nisaysay si Strom nga naglingaw lang sila dihang nakakita siyag dako nga trak ug dinhi nakapangutana siya kon mamahimo pa nga masud ang iyang ulo sa tambutso, saysay niya sa Hutchinson Leader.
Midugang siya nga dihang misuway siya sa nasud ang iyang ulo apan nagproblema siya kay di naman siya makagawas niini.
Apan dihang nakalingkawas na siya sa iyang sitwasyon, gida- kop siya sa mga pulis sa McLeod County Sheriff Department kay matod pa bata pa siya moinom og ilimnong makahubog.
Nangayo siya og pasaylo sa tag-iya sa trak.
Nakahinumdum pa siya nga napasok iyang ulo ug nitan-aw siya ngadto sa tag-iya unya nangayo siyag pasaylo ug giingnan siya niini nga nalipay siya nga maayo ra ang iyang kahimtang.
Siya ug ang tambutso nahimong sikat sa ilang lugar.
Human sa insidente, ni-post siyag hulagway sa social media uban sa gigabas nga tambutso nga duna kini kapsyon nga “Yeah I’m the tail pipe girl, whatchu know about it? #winstock2k18kickedmyass.”
Ang tambutso gi-display sa Minnesota sa The Darwin Tavern. /