Anti-tambay campaign angay klarohon

Nakasugat og daghang pagsaway kining pagpasunod ni Presidente Rodrigo Duterte kalabot niining iyang pagpahipos o pagdili na sa pag-istambay. Pero di sab nato malimod nga daghang nakauyon niini, tungod kay napanglantawan nga kon hugot kining mapatuman hayan makahatag kini og seguridad alang sa publiko.

Sigon man sab gud sa naobserbahan, daghan man hinuong panghitabo o mga krimen nga napasiugda tungod niining pagsigi ug estambay-estambay.

Naay mga tawo nga sa panagtapok-tapok o pagtambay-tambay motumaw ang kasipat ug duna say gustong magpabilib.

Giingon sab nga dinhi man gud magsugod pagmugna ang kabuang ilabi na kon magkapundok ang mga batan-on. Busa angay lang gyud kining ipatuman.

Unsaon man pag-ila kon kini sila o siya istambay ba? Dili kaha kini mahimong abusahan sa atong mga kapulisan? Unsa man gyuy klasing estambay ang gusto nga ipahipos ni Duterte?

Kini maoy pipila lang sa mga pangutana nga angay hatagan og katin-awan sa mga kadagkuan sa kapulisan tungod kay daghan ang naglibog ning maong kamandoan.

Duna nay mga kalit lang gipangdakop bisan og walay sala nga nahimo. Unya maayo ra ba nga moingon kining atong kapulisan nga igo lang sila nagtuman sa mando sa ilang labaw.

Hinaot nga ang nahitabo sa 25 anyos nga si Genesis Argoncillo, kinsa namatay sulod sa bilanggoan didto sa Kaulohan sa dihang gikulata kini human dakpa tungod kay wa magsulob og t-shirt nga naglakaw sa pampublikong lugar, dili na mausban pa.

Sa gikaingon ko na, uyon kita niining balaora apan kinahanglan iklaro una kini aron di malapas ang atong tawhanong katungod.