Drug test sa Grade 4

Nagplano ang Philippine Drug Enforcement Agency (PDEA) nga ipaubos ang mga estudyante sa elementary gikan sa grade 4 hangtod sa grade 12 sa mandatory drug test. Mga 10 years ang pangidaron sa grade 4. Kini aron gyud pagsiguro nga sa ilang linghod nga salabutan, dili sila mahitumpawak sa kaalautan sa paggamit og illegal nga drugas. Apan mialma ang Department of Education (DepEd) officials kay matod pa usa ka illegal ang maong lakang.

Ubos sa Comprehensive Dangerous Drugs Act of 2002, ang mga tinun-an lamang sa sekondarya ug sa kolehiyo ang mamahimong mapaubos sa random drug test. Gikinahanglan nga i-amendar usa ang balaod sa dili katugutan ang maong lakang. Gawas pa, dako ang magasto sa maong plano. Matod pa sa DepEd nga adunay 14 milyones ka mga tinun-an sa elementary lukop nasud.

Kon ipa-ubos tanan sa drugtest unya tag-200 pesos ang matag drug testing kit, mokabat ngadto sa P2.8 bilyones ang magastu. Sus, pagkadako na ana. Nganong dili man lang gamiton ang maong kantidad pagtukod og dugang mga school buildings, pagpamalit og mga instructional materials o mga libro o pag-hire og dugang mga school teachers?

Gawas pa, makamugna kini og traumatic experience sa mga bata kay linghod pa sila og salabutan. Kuhaan sila og sample sa ihi unya magpabilin nga confidential ang resulta. Dili puwede nga ibutyag sa publiko ang resulta kay ang mga bata gi-protektahan sa rule on confidentiality.

Unya pananglitan kon adunay mag-positibo unsa man ang sunod nga mahitabo? Paundangon ang bata aron ipaubos sa rehabilitation? Kon pananglitan gihapon adunay daghan mag-positibo asa man nila ipamutang ang maong mga bata? Anha sa poder sa mga ginikanan? Unya kon dili maka-afford ang mga ginikanan sa pagpa-rehab sa ilang mga anak, dili na usab pa-eskuwelahon? Aw, mapagan ang kaugmaon.

Samtang ning maong mga pangidaron aduna nay nakakat-on og mga binoang pero dili pa siguro daghan. Mas maayo siguro nga estudyohan una og maayo sa PDEA ang lintunganay niining ilang plano.