Di na sala
LIBOD-SUROY. Dili na usa ka salaod ang maglibod-suroy. Gani, bag-ohay lang si Presidente Duterte miingon nga ang “loitering” kon “tambay” dili na usa ka sala. Niadtong Marso 27, 2012 na decriminalized na ang “vagrancy” nga Article 202 sa atong Revised Penal Code.
Morag naitok man gani si President Duterte nga siya ang gibasol sa mga biktima sa kapulisan nga nagpatuyang og panakop bisan way gibasihan. Pung pa ni Presidente Duterte nga wa siya magsugo sa kapulisan nga panakpon ang mga estambay sa dalan o gawas sa ilang balay.
Di man hinuon tanan apan dunay mga pulis nga magpakita og gilas ug di pa mao ang ilang pagssbot sa gisulti sa Presidente. Mga manoy ang balaod o ordinansa ang basihan sa pagpanakop dili og unsay mogawas sa baba sa atong Presidente.
Sakit dawaton apan nahitabo na nga kon wa pa mamatay si Alyas Tisoy sud sa prisohan sa police station didto sa Manila nga ilang gidakop samtang nag-estambay di makaamgo ang atong kapulisan nga ilang gibuhat nakalapas diay sa balaod. Nahitabo ni tungod kay gi-implementar dayon ang orden sa President nga walay orientation sa kapulisan ug wa gi-review ang balaod ug ordinansa sa mga dakbayan ug lungsod.
Uyon kaayo ko sa mando sa Presidente nga ma-implementar ang curfew sa mga batan-on ug nga idili ang mag-estambay sa dalan o mga dapit-publiko kay usa ni sa mga hinungdan sa gubot o kremin.
Si Cebu City Police Office (CPPO) chief Joel Doria usa sa mga pulis opisyal nga makamao sa iyang trabaho. Gi-review usa ni Chief Doria ang mga ordinansa sa dakbayan sa Sugbo nga maoy basi sa pagbadlong o dakop sa mga tambay sa dalan. Tambag ni Chief Doria nga angayan nga makahibawo ang katawhan sa mga ordinansa sa dakbayan.
City Ordinance (CO) 1929 nagdili sa pag-inom og makahubog sa dapit publiko. Executive Order No. 26 nag-implementar sa smoking ban. CO 2108 (anti-dispatching) nagdili sa dispatcher sa mga PUJ; CO 1786, ang curfew sa mga menor de edad; CO 801 nagdili sa roller skates sa dalan; CO 1940 batok sa noise pollution; CO 1361 batok sa mga mangihi, mangluwa, maghugaw-hugaw, ug malibang sa dapit-publiko; ug uban pa nga ordinansa nga nagsakop sa mga edaran ug batan-on nga maapil sa gubot, pamato, rayot ug gang wars.
Gipasalig ni Chief Doria nga ang iyang kapulisan mosubay sa husto nga pamaagi sa pagpanakop sa mga makasalaod. Ang maglakaw nga way saput sa ibabaw tambagan lang nga magsenina. Pung pa ni Doria nga ang mga nagsubay sa balaod way angayan nga kahadlokan. Ang kadto lang dunay mga dautan og huna-huna o buhat ang angayan mahadlok sa balaod ug pulis, dugang pa ni Doria.
Basi sa taho sa SunStar Cebu, 530 ka tawo nga nakasupak sa city ordinance ang gibadlong sa kapulisan niadtong Sabado sa gabii dinhi sa dakbayan sa Sugbo. Samtang didto sa Talisay city, 202 ka tawo, kadaghanan menor de edad, ang nadakpan sa kapulisan sa miaging semana.