Neither one of us
Nag-aper mi si Bonna pagsulod nako sa suki namong fast food sa downtown. Una siyang nahiabot kay kanako. Sunday ron ug wa mi klase. Nakasabot mi nga sa maong fast food maniudto. Puwerte namong suora kay childhood friend man mi. Silingan mi sa Escario. Nagkaklasmet mi gikan sa elementary hangtod na sa hayskol. Usa ra sab ka university ang among gitunghaan sa college apan lain-lain ang kurso nga among gikuha.
Samtang nangaon mi, wa mi laing giestoryahan kondi si Rommel.
“Kinsa kaha ang suwertehon nato niya, no, Mayeen?”
Miinom si Bonna sa iyang softdrinks ug nindot siyag smile. Mikidhat ko niya.
“Aw, ako tingali kay mas guwapa man ko kay nimo.” Mikatawa kog kusog.
“Mas guwapa ko kay nimo, uy, Mayeen.”
Nagkinataw-anay mi si Bonna. Ang importante namo ni Bonna nga ikapagawas namo ang gibati namong kalipay.
Kon si Rommel na gani ang among hisgotan, kilig to the bones ang bation namong kalipay.
Porbida sab ning gugma, uy! Way pilion. Gikaila namo ni Bonna si Rommel sa sulod sa simbahan.
Nanimba mi si Bonna usa ka Domingo ana. Gikatupad namo si Rommel ug kay wa pa man magsugod ang
Santos nga Misa, nag-estoryahay mi si Bonna. Misalga sa among estorya si Rommel. Sa tan-aw namo kang Rommel, friendly siyang pagka tawo. Very smiling. Ug mosamot siya kaguwapo inig pahiyoman niya kay molubyok ang duha niya ka dimples sa isig niya ka aping.
Mao ra to, gikaila namo ni Bonna si Rommel. Pagkahuman sa Misa, giimbetar mi ni Rommel sa atbang nga fast food. Kadto ang sinugdanan nga gikasuod gyud namo ni Bonna si Rommel. Sa laing university siya nag-eskuwela, parehas siya namo ni Bonna, third year sa college. Ug kay nasuod na lagi namo ni Bonna si Rommel, naghatagay mig numero sa among selpon.
Kanunay magpadalag message si Rommel nako. Nindot siyag mga jokes, di corny. Ug mao sab diay kini ang gibuhat ni Rommel ngadto kang Bonna. Aw, sports lang mi si Bonna. Ug sa pagpanglabay sa mga adlaw, nabatyagan namo ni Bonna nga hilom ming nahigugma kangRommel.
“Kadaghang laki ning kalibutana, Mayeen, pero si Rommel gyud ang atong nagustohan?”
Nag-aper na sab mi si Bonna.
(SUMPAYAN)