Panthers batok Warriors sa Partner's Cup

Mga duwa karon 5:15 pm- UC batok CITU ( jrs) 6:45 pm- USPF batok USC (srs)

Langkaton og suway sa University of USPF Panthers ang ikatulo nilang sunodsunod nga kadaugan sa samang gidaghanon sa mga duwa sa ilang pagpakigsangka sa USC Warriors sa main game karong gabii sa Cebu Schools Athletic Foundation Inc. (CESAFI) 2018 Partner’s Cup sa Cebu Coliseum.

Ning maong pre-season, ang Panthers nakapagawas og seryusong mensahe ngadto sa ubang teams human sila mirehistro og dagkong kadaugan batok sa SWU Cobras ug CITU Wildcats sa nag-una nilang duha ka mga tahas.

Ang Cameeronian import nga si Rich Managor mao ang nangulo sa dalaygong gipakita sa Panthers inabagan nila ni Karl Langanin, Roy Quiachon, ug Mhike Patalinghug.

Si Managor, kinsa kadiyot ra nakapakita og aksyon sa miaging regular season gumikan sa iyang angol (torn ACL), nipakita sa iyang kaandam aron agakon ang Panthers sa umaabot nga season.

Lutaw-unlod ang kampanya sa Warriors ning maong pre-season unya gikan sila sa dakong kapildihan batok sa league-leader UC Webmasters, 53-77, niadtong Dominggo.

Sa ilang bitbit nga 2-3 nga rekord, ang Warriors nakapakita nga aduna sab sila’y ikabuga.

Sa premirong duwa, magsangka ang UC Baby Webmasters ug Cebu Institute of Technology University (CITU) Wildcats sa high school division.

Ang Baby Webmasters naggunit og 2-1 nga rekord samtang ang Wildcats adunay 0-3 nga baraha.