Borgonia sulod sa grand finals sa CEPCA Age group chessfest
Nakasulod sa grand finals si Duane Borgonia sa 20 & Under category human niya gipatigbabawan ang Hunyo nga edisyon sa Cebu Executives and Professionals Chess Association (CEPCA) Age-Group Monthly Competition nga nahuman niadtong Dominggo sa J Centre Mall sa Mandaue City.
Human sa kompetisyon, si Borgonia nakatigom og 4.5 puntos.
Nagsunod kang Borgonia mao sila si Adrian Basilgo (4.0 pts), Christian Klent Pondoyo (3.5 pts), ug Edel Vosotros (3.5 pts).
Sa 16 & Under category, si Vic Gyles Derotas maoy bagong nakaabante sa grand finals human siya mipatigbabaw sa ilang grupo.
Human sa single round Swiss system, nagtabla unta sila si Derotas ug Arje Villarin sa 3.5 puntos apan midaog si Derotas sa tie-break hinungdan nga midakin-as si Villarin sa ikaduhang luna.
Miangkon sa ikatulong dapit mao si Marphine Faith Mangubat (3.0 pts) ug ikaupat si Ace Rheniel Binonggo (2.0 pts).
Sa 12 & Under, nipatigbabaw na sab Jervy Villarin pinaagi sa iyang 4.5 puntos.
Hinuon ning maong kategorya, ang 2nd placer nga si Nicole Mangubat maoy bagong nakaabante sa grand finals kay naka-qualify na mang daan si Villarin.
Milabni sa ikatulong dapit mao si John Jacob Pañe (3.5 pts) ug ikaupat si Ivan Niño Mamac (3.0 pts).
Ang CEPCA nagpahigayon ning maong torneyo sa tinguha nga makakaplag og batan-ong chess players nga adunay potensyal nga makahatag og dakong garbo sa Sugbo ug sa tibouk Pilipinas sa ugma damlag.